Tutynýshylar quqyǵyn qorǵaıtyn qoǵamdyq uıymdar bir qaýymdastyqqa birigedi – mınıstr

NUR-SULTAN. QazAqparat – Qazaqstanda tutynýshylar quqyǵyn qorǵaıtyn qoǵamdyq uıymdar bir qaýymdastyqqa birigedi. Bul týraly ІH Azamattyq forýmda QR Saýda jáne ıntegratsııa mınıstri Baqyt Sultanov aıtyp berdi, dep habarlaıdy QazAqparat tilshisi.

«Prezıdent ótken jylǵy halyqqa Joldaýynda azamattyq qoǵamdy qoldaý men nyǵaıtý qajettigin atap ótti. Dál osy ıdeıa jáne jazda engizilgen túzetýlerimiz tutynýshylar quqyǵyn qorǵaý júıesin aıtarlyqtaı ózgertti. Onyń ishinde tutynýshylardyń buzylǵan quqyqtaryn qalpyna keltirý, qoǵamdyq baqylaýdy engizý, qoǵamdyq birlestikterge tutynýshylyq daýlardy sotqa deıin retteý sýbektileri retinde quqyqtar berý mańyzdy», - dedi mınıstr ІH Azamattyq forýmda úkimettik emes uıymdarmen kezdesý barysynda.

Onyń aıtýynsha, qoǵamdyq uıymdardy bir qaýymdastyqqa biriktirý boıynsha úlken jumys júrgizilýde. Bul sheshim birlestikter ınstıtýtyn «Sannan sapaǵa» qaǵıdaty boıynsha qaıta formattaýǵa, olardyń tutynýshylardyń quqyqtaryn qorǵaý júıesine yqpalyn kúsheıtý úshin birlestikterdiń mártebesin kóterýge, barlyq úkimettik emes uıymdar úshin teń múmkindikterdi qamtamasyz etýge, olardyń qyzmetindegi tar beıindi baǵyttardy damytýǵa, memlekettiń tutynýshylyq daýlardy sheshýge qatysýyn barynsha azaıtýǵa kómektesedi.

«Tutynýshylardyń quqyqtaryn qorǵaý jónindegi ombýdsmen birlestiktiń «rýpory» rólin atqarady jáne uıymnyń ókildik fýnktsııalaryn ózine alady. Ol qaýymdastyq atynan Parlament pen Úkimetke júgine alady. Qaýymdastyq pen ombýdsmen ókilettikteri men derbestigi jańa ınstıtýttardyń táýelsizdigine kepil bolady. Bul rette tutynýshylyq shaǵymdardy qabyldaýdyń biryńǵaı aqparattyq júıesi jumys isteıdi jáne aqparattyń negizgi kózi bolady. Osy múmkindikti paıdalana otyryp, tutynýshylardyń quqyqtaryn qorǵaý salasyndaǵy qoǵamdyq birlestikterdi platformaǵa qosylýǵa shaqyramyn», - dedi B. Sultanov.