Tutynýshylar quqyǵyn qorǵaý, metrologııa jáne saýda komıtetteri biriktiriledi

NUR-SULTAN. QazAqparat – QR Premer-Mınıstrniń orynbasary-Saýda jáne ıntegratsııa mınıstri Serik Jumanǵarın Úkimet otyrysynan keıin BAQ ókilderine azyq-túlik naryǵyn baqylaýǵa vedomstvonyń adamdary jetpeı jatqanyn aıtty, dep habarlaıdy QazAqparat tilshisi.

«Jańa ǵana Premer-Mınıstr tapsyrma berdi. Óńirlerde naryqty baqylaıtyn komıssııalarymyz bar. Sol komıssııalarda jumys durys atqarylmaǵan, formaldy ǵana bolǵan. Ol týraly resmı aqparat tarattyq ta. Eki óńirde ákimniń orynbasary ákimshilik jaýapkershilikke tartylyp jatyr», - dedi mınıstr.

Serik Jumanǵarınniń aıtýynsha, Úkimet óz qaramaǵyndaǵy mınıstrlikti ishinara qurylymdaý týraly másele kótergen.

«Qazir bizde adamdar jetpeı jatyr. Mınıstrliktegi metrologııa, saýda, tutynýshylardyń quqyǵyn qorǵaý komıtetterin biriktirip, bir departament jasaımyz. Sebebi búkil adamdardy bir ýysqa biriktirý qajet bolyp otyr. Baqylaýǵa alýǵa adam jetpeı jatyr», - dedi Serik Jumanǵarın.