Tutynýshylar qoǵamdyq birlestikteriniń ókilettik aıasy keńeıe túsedi
Ulttyq ekonomıka vıtse-mınıstri Tımýr Jaqsylyqovtyń aıtýynsha, zań jobasynyń negizgi maqsaty tutynýshylar quqyǵyn qorǵaý salasyn retteý qaǵıdattaryn aıqyndaý, tutynýshylar quqyǵyn qorǵaýǵa baǵyttalǵan jańa tetikterdi engizý men qoldanystaǵy mehanızmderdi jetildirý bolyp tabylady. «Sonymen qatar, zań jobasy boıynsha tutynýshylar quqyǵyn qorǵaý júıesiniń memlekettik retteý sapasyn jaqsartýǵa baǵyttalǵan sharalar qamtylady. Tutynýshylar qoǵamdyq birlestikteriniń róli keńeıe túsedi», - dedi vıtse-mınıstr. Onyń aıtýynsha, zań jobasy arqyly taýarlardy satý, qaıtarý jáne aýystyrý talaptary jetildirile túsedi. Jumystardy atqarý men qyzmetter kórsetý sharttary naqtylanyp, elektrondyq saýdanyń quqyqtyq qaǵıdattary aıqyndalady.
«Budan bólek, tutynýshylar quqyǵyn qorǵaý jónindegi zańnamany jetildirý jónindegi memlekettik organdardyń salalyq úılestirý jumystaryn kúsheıtý qaralyp otyr. Soǵan oraı Úkimetke, odan ári QR Prezıdentine joldanatyn Qazaqstandaǵy tutynýshylar quqyǵy qorǵalýynyń jaı-kúıine baılanysty jyl saıynǵy esep ázirlenetin bolady. Tutynýshylardyń jáne tutynýshylar quqyqtaryn qorǵaý jónindegi memlekettik organdardyń shaǵymdaryna jartyjyldyq jáne jyldyq taldaýlar jasalady», - dedi T. Jaqsylyqov.
Onyń aıtýynsha, qoǵamdyq birlestikter ókilettigin nyǵaıtý úshin tıisti memlekettik organdarǵa qaýipsizdik pen sapa talaptaryna sáıkespeıtin taýarlardy shyǵaryp, jumystardy, qyzmet kórsetýlerdi júzege asyrǵan kináli tulǵalarǵa qatysty sharalar qoldaný týraly aqparattar joldanatyn bolady. Tutynýshylardyń qoǵamdyq birlestikterine tutynýshylar múddeleri úshin talap-aryzdar berý quqyǵyn júkteý de usynylyp otyr.
Zań jobasy palatanyń aldaǵy ýaqytta ótetin jalpy otyrysyna shyǵarylady.
