Tutynýshylar qoǵamdyq birlestikteriniń ókilettigi zańdyq turǵyda keńeıedi
ASTANA. QazAqparat - Tutynýshylar qoǵamdyq birlestikteriniń ókilettigi zańdyq turǵyda keńeıedi. Bul týraly búgin Májiliste «Qazaqstan Respýblıkasynyń birqatar zańnamalyq aktilerine tutynýshylar quqyqtaryn qorǵaý máseleleri boıynsha ózgerister men tolyqtyrýlar engizý týraly» zań jobasyn tanystyrǵan Ulttyq ekonomıka vıtse-mınıstri Tımýr Jaqsylyqov málim etti.
Vıtse-mınıstrdiń aıtýynsha, zań jobasynda tutynýshylar quqyqtaryn qorǵaý jaǵdaıy týraly jyl saıynǵy esepti Úkimetke joldaý máseleleri qarastyrylady. Bul esep sosyn Memleket basshysyna da usynylady. Sonymen qatar, tutynýshylar shaǵymynyń jartyjyldyq taldaýy men tutynýshylar quqyqtaryn qorǵaý máseleleri boıynsha memlekettik organdardyń jyl saıynǵy taldaýy júrgiziletini kózdelip otyr. «Zań jobasymen tutynýshylardyń aqparattandyrylýy, konsýltatsııalary men olardy aqparattyq qamtýdy júzege asyrý máseleleri qaralady. Tutynýshylarǵa satylatyn ónimder men qyzmetter boıynsha bekitilgen tehnıkalyq reglamentter talaptarynyń saqtalýyna memlekettik baqylaý júzege asatyn bolady», - dedi T. Jaqsylyqov.
Onyń sózine qaraǵanda, zań jobasy aıasynda tutynýshylar qoǵamdyq birlestikteriniń ókilettigi keńeıtiledi. «Bul rette birlestikter qaýipsizdik pen sapa talaptary boıynsha bekitilgen talaptarǵa saı kelmeıtin taýarlar shyǵarý men satýǵa qatysty kináli tulǵalarǵa sharalar qoldaný úshin memlekettik organdarǵa aqparattar bere alady. Budan bólek, eger olardyń quqyqtary buzylǵan jaǵdaıda tutynýshylar qoǵamdyq birlestikteriniń músheleri bolyp tabylmaıtyn tulǵalardyń múddeleri úshin shaǵymdar bere alady», - dedi T. Jaqsylyqov.
