Tutynýshylar birlestikterine qoǵamdyq baqylaý júrgizý quzyreti beriledi

NUR-SULTAN. QazAqparat - Elimizde tutynýshylardyń qoǵamdyq birlestikterine qoǵamdyq baqylaý júrgizý quzyreti beriledi. Bul týraly QR Parlamenti Senatynyń jalpy otyrysynda tutynýshylardyń quqyqtaryn qorǵaý máseleleri kózdelgen zań jobasyn tanystyrǵan QR Saýda jáne ıntegratsııa mınıstri Baqyt Sultanov aıtty, dep habarlaıdy QazAqparat tilshisi.

Mınıstrdiń aıtýynsha, «Qazaqstan Respýblıkasynyń keıbir zańnamalyq aktilerine tutynýshylar quqyǵyn qorǵaý máseleleri boıynsha ózgerister men tolyqtyrýlar engizý týraly» QR Zańynyń jobasynda tutynýshylardyń quqyqtaryn qorǵaý jumystaryna úkimettik emes uıymdar belsendi taratý qarastyrylady. Sonymen qatar olarǵa qoldaý kórsetiledi.

«Buzylǵan quqyqtardy tolyqqandy qalpyna keltirý maqsatynda tutynýshylyq daýlardy sotqa deıingi retteý sýbektilerine eki jaqty kelisim bolǵan jaǵdaıda moraldyq zııandy óteýdi júzege asyrý quqyǵy beriledi. Shaǵyn jáne orta bıznesti tekserýge engizilgen moratorııdi eskere otyryp, tutynýshylardyń qoǵamdyq birlestikterine qoǵamdyq baqylaý júrgizý boıynsha quzyretin berý kózdeledi. Budan basqa, halyqtyń áleýmettik osal toptaryna óz quqyqtaryn qorǵaýǵa tegin ókildik qyzmetter kórsetý jáne olarǵa keńes berý úshin qoǵamdyq uıymdarǵa memlekettik áleýmettik tapsyrys beriletin bolady», - dedi ol.

Sondaı-aq Baqyt Sultanov atalǵan zań jobasyna Májilisi depýtattary tarapynan birqatar túzetý engizilgenin aıtty.

«Olar - qoǵamdyq birlestikterge daýlardy sotqa deıingi retteý sýbektileri retinde qyzmet etýge múmkindik berý, vedomstvoaralyq keńesti Úkimet deńgeıine shyǵarý boıynsha túzetýler. Engizilgen túzetýlerdiń bir toby «Saýda qyzmetin retteý týraly» Zańǵa, atap aıtqanda áleýmettik mańyzy bar azyq-túlik taýarlary baǵalarynyń baqylaýsyz ósýine jol bermeýge baǵyttalǵan», - dedi mınıstr.