Tutynýshy quqyǵyn qorǵaý: Endi uıaly telefondy tapsyryp, aqshasyn qaıtarýǵa bolady

NUR-SULTAN. QazAqparat – Elimizde «Tutynýshylardyń quqyqtaryn qorǵaý týraly» zańǵa ózgerister engiziledi. Oǵan sáıkes, endi satyp alýshylar kóńilinen shyqpaǵan uıaly telefondardy tapysyryp, aqshasyn qaıtaryp ala alady. Buryn zańda mundaı norma bolmaǵan edi.

Bul týraly Soltústik Qazaqstan oblysy Tutynýshylardyń quqyǵyn qorǵaý departamentiniń basshysy Lázim Mııasheva aıtty, dep habarlaıdy QazAqparat tilshisi.

«Qoldanystaǵy «Tutynýshylardyń quqyqtaryn qorǵaý týraly» QR zańynda tutynýshy azyq-túlikten basqa taýardy satyp alǵan sátten bastap 14 kún ishinde ony aıyrbastap alýǵa quqyly. Satýshyda aıyrbastaýǵa qajetti taýar bolmaǵan jaǵdaıda ol taýardy qaıtaryp alyp, aqshasyn berýge mindetti. Eskeretini – taýar qoldanylmaǵan jáne buzylmaǵan kúıinde saqtalýy tıis. Aıta ketý kerek, azyq-túlikten basqa taýarlardyń barlyǵyn birdeı aıyrbastaýǵa, qaıtarýǵa bolmaıdy. Máselen, dárilik zattar men medıtsınalyq buıymdar, ish kıim, shulyq, janýarlar men ósimdikter, talshyqtardan jasalǵan matalar, trıkotaj jáne gardın tósemi, kilem, shilter, baý, sym, uıaly telefondar qaıtarýǵa jatpaıdy.

Al zań engiziletin túzetýler nátıjesinde bul tizimnen uıaly telefondardy alyp tastaý kózdelgen. Osy túzetýler qabyldaǵan kezde tutynýshy, uıaly telefondy aıyrbastaý jáne qaıtarý múmkindigine ıe bolady», - dep enetin ózgeristerge toqtaldy Lázim Mııasheva.

Onyń aıtýynsha, jańa ózgeristerge saı satýshy taýardy qaıtarǵan sátten bastap 3 jumys kúni ishinde tutynýshyǵa aqshany qaıtaryp berýge mindetteledi. Sondaı-aq, satýshyda aıyrbastaýǵa qajetti taýar bolmasa, onda ol on kún ishinde jańa taýardy taýyp berýi tıis.

Qosa ketsek, bul ýaqytqa deıin elimizde tutynýshylar quqyǵyn qorǵaıtyn Ombýdsmen ınstıtýty engiziletinin habarlap edik.