Tutynýshy quqyǵyn buzǵan kommýnaldyq uıymdardyń tarıfi arzandatylady

NUR-SULTAN. QazAqparat – QR Ulttyq ekonomıka mınıstrligi Tabıǵı monopolııalardy retteý komıteti tóraǵasynyń mindetin atqarýshy Ashat Japsarbaı tutynýshy quqyǵyn buzǵan kommýnaldyq mekemelerge qoldanatyn jazanyń sıpaty ózgeretinin málim etti, dep habarlaıdy QazAqparat tilshisi.

«Biz qoǵamdyq mańyzy bar naryqta jumys isteıtin tabıǵı monopolııa sýbektilerin ákimshilik jaýapqa tartqan kezde ol sharanyń tutynýshylarǵa qandaı jaǵymdy áser bolady degen saýalǵa tirelemiz. Óıtkeni, ásirese, memleket menshigindegi sýbektiler bir qatelikti jyl saıyn qaıtalap jatady. Osylaısha qomaqty aıyppuldardyń tıimdi áseri bolmaıdy. Sondyqtan Tabıǵı monopolııalar týraly zańǵa ákimshilik aıyppuldardy ekonomıkalyq sıpattaǵy aıyppuldarmen almastyrý týraly túzetý engizbekshimiz. Jumys toptary ony qarap jatyr», -degen komıtet basshysy atalmysh túzetýdiń mánin bylaısha dep túsindirdi.

«Bul túzetýdiń máni nede? Eger tabıǵı monopolııa sýbektisi tutynýshylarǵa qatysty qandaı da bir zań buzsa, bıýdjetke túsetin aıyppuldyń ornyna tarıfti azaıtý tetigin qoldanamyz. Eger kórsetilgen qyzmet sapasy tómen bolsa, halyq úshin nemese quqyǵy buzylǵan naqty tutynýshy úshin tarıf tómendetiledi. Al, kórsetken qyzmet sapasy joǵary bolsa, qosymsha bonýs beriledi. Biz tarıfti qalyptastyrý tártibine osyndaı yntalandyrý tetigin engizýdi usynyp otyrmyz. Qysqartyp aıtqanda, Tabıǵı monopolııalar komıteti ákimshilik aıyppuldardyń ornyna ekonomıkalyq sıpattaǵy aıyppuldardy qoldanýdy uıǵaryp otyr», - dedi Ashat Japsarbaı.