Tutynýshy kredıt kólemi bir jylda 21% ósken
«Munaı baǵasynyń joǵary bolǵan kezde belsendi fıskaldyq saıasat aqsha massasynyń ósýine yqpal etý arqyly ınflıatsııaǵa áserin tıgizedi. Jyl basynan beri aqsha massasy 7,9% nemese 2,4 trln teńgege ósti. Memlekettik bıýdjet shyǵysy ınflıatsııadan asatyn jyldam qarqynmen ósýde.
Inflıatsııalyq protsesterdiń ósýi aıasynda tutynýshylyq suranys parametrleriniń turaqty dınamıkasy saqtalýda. Nomınaldy bólshek saýda aınalymynyń kólemi 2022 jylǵy toǵyz aıdyń qorytyndysy boıynsha ótken jylmen salystyrǵanda 15,7%-ǵa ósti. Suranys tarapynan jeke tulǵalardyń tutynýshylyq kredıtteriniń ósýi qosymsha proınflıatsııalyq qysym týdyrady. 9 aı ishinde tutynýshylyq kredıt ótken jyldyń osy kezeńimen salystyrǵanda 21,4%-ǵa ósti», - dedi Ulttyq bank basshysy.
Onyń málimeti boıynsha, jyldyń 9 aıynda jalpy ishki ónimniń ósýi bizdiń boljamymyzǵa sáıkes qalyptasyp, 2,8% bolǵan. Al taý-ken salasyndaǵy álsiz dınamıka iskerlik belsendilikti baıaýlatqan.
«Ol elimizdiń negizgi ken oryndaryna jóndeý júrgizýmen jáne Qashaǵan zaýytyndaǵy apatpen baılanysty. Óńdeý ónerkásibi, saýda, aqparat jáne baılanys, kólik salalary jáne aýyl sharýashylyǵy jalpy ishki ónimniń ósýine oń úles qosýda.
Ekonomıkanyń damý dınamıkasynyń bizdiń boljamymyzdan aýytqýy baıqalmaıdy. Jalpy ishki ónimniń ósýi qalyptasqan baǵa konıýnktýrasy jáne jyl sońyna qaraı munaı óndirisiniń ósý qarqynynyń qalpyna kelýi aıasynda ishki suranys pen naqty eksporttyń oń traektorııasymen qamtamasyz etiletin bolady.
Bul rette Qazaqstan ekonomıkasynyń ornyqty damýyna kedergi keltiretin táýekelder ósip kele jatqan ınflıatsııalyq protsester tarapynan qalyptasýda», - dedi Ǵalymjan Pirmatov.
