Tútin tumshalaǵan Óskemen: Ekologter tekserý qorytyndysyn jarııa etti

ÓSKEMEN. KAZINFORM — Óskemen qalasy turǵyndary aýa sapasynyń kúrt nasharlap ketkenine shaǵymdanǵan soń ekologter tekserý júrgizdi.

ShQO ekologııa departamenti baspasóz qyzmetiniń málimetine súıensek, 25 qarashada tańerteńnen áleýmettik jelide Óskemendi tútin basqan vıdeolar taraǵan soń mamandar qalanyń birneshe yqshamaýdandaryna baryp, aýa sapasyn tekserdi.

«Ólsheý jumystary kúni boıy arnaıy jabdyqpen júrgizildi. Sonyń nátıjeleri boıynsha atmosferalyq aýadaǵy lastaýshy zattardyń shekti ruqsat etilgen kontsentratsııasynan asý deregi anyqtalǵan joq. „Qazgıdromet“ RMK Shyǵys Qazaqstan oblysy boıynsha fılıaly usynǵan avtomatty baqylaý beketteriniń derekteri boıynsha da lastaýshy zattardyń birjolǵy shekti ruqsat etilgen kontsentratsııasynyń asyp ketýi tirkelmedi», — delingen aqparatta.

Aıta keteıik, 23 qarashadan bastap Óskemende qolaısyz meteorologııalyq jaǵdaı qalyptasqan. Bul 26 qarashaǵa deıin sozylady dep kútiledi.

Eske salsaq, osyǵan deıin Óskemendegi Nazarbaev dańǵylynda ornalasqan Dostyq úıi men Gagarın býlvary kóshesiniń mańyndaǵy turǵyn úılerdiń halqy aýa sapasynyń nasharlap ketkenine shaǵymdanǵan. 

Ekologtar tekserý júrgizgen soń hlorsýteginiń shekti ruqsat etilgen kontsentratsııasynan asyp ketýi tirkelgen. 

25 qarashada óskemendikter taǵy da aýa sapasynyń nasharlaǵanyna shaǵymdandy.