Tútin deńgeıi tekseriledi: Almatyda 1 qyrkúıekten bastap avtokólikter tehnıkalyq tekserýden ótýi tıis
ALMATY. KAZINFORM — Bıyl 1 qyrkúıekten bastap Almatyda benzın, gaz jáne dızel otynymen júretin avtokólikter ekologııalyq normatıvterge sáıkestigin anyqtaý úshin tehnıkalyq tekserýden ótýi tıis. Bul týraly A-parking mamandary málimdedi.
Almaty ákimdigine qarasty uıymnyń málimetinshe, bul tehnıkalyq tekserý — mindetti tehnıkalyq baıqaýdyń quramdas bóligi emes, jeke rásim bolyp sanalady. Onyń barysynda shyǵaryndylar deńgeıi ólshenedi: benzınmen jáne gazben júretin avtokólikterdiń paıdalanylǵan gazdyń ýyttylyǵy, al dızeldi kólikterdiń tútin shyǵarý deńgeıi tekseriledi. Tekserý QR ST 1433-2023 ulttyq standartyna sáıkes júrgiziledi.
— Tehnıkalyq tekserýden merziminen buryn ótýdiń qajeti joq. Jańa talap kezekti mindetti tehnıkalyq baıqaý merzimi 1 qyrkúıekten keıin keletin avtokólikterge ǵana qoldanylady. Eger avtokólik 2026 jyly 1 qyrkúıekke deıin tehnıkalyq baıqaýdan ótse, berilgen qujat belgilengen merzimi aıaqtalǵanǵa deıin jaramdy bolady. Tehnıkalyq baıqaýdan qaıta ótýdiń nemese osy merzimge deıin ekologııalyq tekserýden ótýdiń qajeti joq, — dep habarlady A-parking.
Mindetti tehnıkalyq baıqaýdan burynǵydaı kez kelgen qoldanystaǵy tehnıkalyq baıqaý ortalyǵynda ótýge bolady. Al shyǵaryndylar deńgeıin ólsheýge arnalǵan tehnıkalyq tekserý qajetti jabdyqpen qamtylǵan akkredıttelgen stantsııalarda ǵana júrgiziledi. Sondaı-aq avtokólik ıesi qalaýy boıynsha akkredıttelgen stantsııada eki rásimnen de — tehnıkalyq tekserý men mindetti tehnıkalyq baıqaýdan birden óte alady.
Akkredıttelgen stantsııalardyń tizimi almaty-parking.kz saıtynda jarııalanady.
Eske salaıyq, Almatyda tekserilgen ár tórtinshi kólik ekologııalyq normaǵa sáıkes kelmeıtini belgili boldy.
Buǵan deıin 2027 jyly Almatyda kúshine enetin atmosferalyq aýany qorǵaý qaǵıdalaryn boıynsha Kazinform tilshisi Almaty qalasynyń Ekologııa jáne qorshaǵan orta basqarma basshysynyń orynbasary Arshat Bahtygereevpen suhbattasqan bolatyn.
