Tutqynǵa alýǵa balama bolatyn jazalardy keńinen qoldaný kerek - semınar
ASTANA. 7 jeltoqsan. QazAqparat /Aıdar Ospanalıev/ - Búgin Joǵarǵy sotta Qazaqstan Respýblıkasyndaǵy jaza qoldaný tájirıbesi men osy saladaǵy zańnamalardy jetildirý máselesine arnalǵan semınar ótti.
Atalmysh sharaǵa sýdıalar men quqyq qorǵaý salasynyń mamandary men Parlament depýtattary jáne azamattyq qoǵam ınstıtýttary men halyqaralyq uıym ókilderi qatysty. Jıyn barysynda olar qazaqstandyq zańnamalar men quqyq qorǵaý tájirıbesi jaza qoldaný barysynda azamattardyń quqyqtarynyń tolyqqandy saqtalýyna qanshalyqty yqpal ete alady degen másele tóńireginde pikir almasty. Bul rette basty nazar ásirese jaza qoldaný tájirıbesi baǵytyndaǵy Quqyqtyq saıasatty zertteý ortalyǵynyń statıstıkalyq sholýlaryna aýdaryldy.
Atalmysh ortalyqtyń derekterinshe, tutqynǵa alý ázirge jaza qoldaný baǵytyndaǵy basty sharalardyń biri bolyp otyr. Al halyqaralyq standarttarǵa sáıkes ol eń sońǵy shara bolýy tıis. 2009 jyldyń málimetteri boıynsha, tutqynǵa alý jónindegi talap-tilekterdiń 96,5 paıyzy sot organdary tarapynan qanaǵattandyrylǵan. Qalyptasqan jaǵdaıdy ózgertý úshin jaza qoldaný sharalarynyń tizimin zań júzinde qysqartqan jón. Ustalǵan azamatqa qun tóleý, úıden shyǵarmaý sııaqty bas bostandyǵynan aıyrýmen baılanysty emes ózge quqyqtyq shekteýlerdi jıi qoldanǵan jón nemese jaza qoldanýdy anyqtaý ókilettigin sotqa bergen durys.
Osyǵan qaraı jıynda kún tártibindegi másele jóninde sóz qozǵaǵan Sýdıalar odaǵynyń tóraǵasy, Joǵarǵy sottyń sýdıasy Vladımır Borısovtyń sózine qaraǵanda, jaza qoldaný tájirıbesi Qazaqstandaǵy quqyq qorǵaý júıesin reformalaý máselelerine baılanysty erekshe ózekti bolyp otyr. «Bul oraıda reformanyń basty erekshelikteriniń biri - qylmystyq qýdalaýdy bolashaqta múmkindiginshe qysqartý bolyp otyr. Bul máselede jaqsy jetistikke qol jetkizýdiń eń utymdy joldarynyń biri- tutqynǵa alýǵa balama bolatyn jazalardy keńinen qoldanýǵa jol ashý», - dedi Joǵarǵy sottyń sýdıasy.
