tutkyn.kz saıtynda Ekinshi dúnıejúzilik soǵys kezindegi 30 myńnan astam qazaqstandyq tutqynnyń tizimi jarııalandy

ASTANA. QazAqparat - tutkyn.kz saıtynda Ekinshi dúnıejúzilik soǵys kezindegi 30 myńnan astam qazaqstandyq tutqynnyń tizimi jarııalandy. Bul týraly búgin QR Prezıdenti janyndaǵy Ortalyq kommýnıkatsııalar qyzmetinde ótken brıfıngte QR Muraǵatynyń dırektory Borıs Japarov aıtty.

"2015 jyldyń basynan biz "Ekinshi dúnıejúzilik soǵystaǵy qazaqstandyq áskerı tutqyndar" jobasyn qolǵa alǵan bolatynbyz. Oǵan qoǵam tarapynan da, jýrnalıster tarapynan da úlken qyzyǵýshylyq týyp otyr. Biz bul jumysty jalǵastyra beremiz. Jýyrda ashylǵan tutkyn.kz atty portalymyzda osy soǵys kezinde tutqynǵa túsken 30 myńdaı qazaqstandyqtyń tizimin jarııaladyq. Jalpy, tutqyndardyń sany óte kóp bolǵan. Máselen, soǵysqa qatysqan qyzyl áskerdiń jalpy sany 26 mln. shamasynda. Olardyń 5,7 mıllıony tutqynǵa túsken. Solardyń 200 myńdaıy qazaqstandyq bolatyn", - dedi B.Japarov.

Onyń aıtýynsha, jýyq arada saıttaǵy tizim 50 myń esimge deıin kóbeıtilmek.