Tutqyn bolǵan otandastarynyń Qazaqstandaǵy taǵdyryn Japonııa depýtattary Nazarbaevtan estidi
TOKIO. QazAqparat - Japonııa Parlamentinde sóz sóılegen QR Prezıdenti Nursultan Nazarbaev elimizde tutqynda bolǵan japondyqtyń taǵdyry jaıynda sóz etti, dep habarlaıdy QazAqparattyń arnaýly tilshisi Tokıodan.
«Jer aýdarylyp kelgen keńestik Qazaqstannyń qatal jaǵdaıymen betpe-bet kelgen japondyq áskerı tutqyndardyń shydamdylyǵy týraly estelikter áli jadymyzda. Men sizderge este qalǵan bir oqıǵany aıtyp bergim keledi. Hokkaıdonyń 15 jastaǵy turǵyny Ahıko Tetsýro áskerı tutqyndarmen birge burynǵy KSRO-ǵa tap bolyp, onda halyq jaýy retinde 10 jylǵa sottalǵan. Degenmen, sol jasóspirimniń eshqandaı kinási joq bolatyn», - dedi Elbasy.
Memleket basshysynyń atap ótýinshe, ol Qazaqstan jerinde 50 myń japondyq áskerı tutqyndarmen birge 10 jyl jazasyn ótegen, 24 jasynda túrmeden shyqqan Ahıko qazaq jerinde shańyraq kóterip, 2 balanyń ákesi atanyp, Qazaqstannyń azamaty bolǵan.
«Stalındik lagerlerdiń sumdyqtaryna qaramastan ol Qazaqstandy óziniń otany sanady. 50 jyl ótti. Ol tarıhı otanyna qaıta orala aldy. Óziniń týǵan-týystarymen tabysty. Olardyń ýájderine qaramastan óziniń otany sanaıtyn Qazaqstanǵa qaıta oraldy. Qazir ol 86 jasta. Ahıko qazir elimizdiń Qaraǵandy oblysynyń qurmetti azamaty. Áıeli Elenamen birge 4 balany tárbıelep otyr. Bul bizdiń elderimiz arasynda jandy baılanys. Qazaqtardyń qaıyrymdylyǵy onyń ómirin saqtap qaldy jáne ol Qazaqstandy jaqsy kóredi», - dedi Elbasy.
