Tutqyn kúndeligi: Nıkolıa Sarkozıdiń kitaby qashan jaryqqa shyǵady

ASTANA. KAZINFORM — Frantsııanyń burynǵy prezıdenti Nıkolıa Sarkozı Parıjdegi La Santé túrmesinde nebári 20 kún bolyp, bul ýaqyt aralyǵy kitap jazýǵa jetkilikti boldy, dep habarlaıdy BILD.

Eks-prezıdent áleýmettik jelide kitap 10 jeltoqsanda jarııalaıtynyn habarlady. Kitaptyń ataýy «Tutqyn kúndeligi» bolmaq.

Sarkozı óziniń jazbasynda kitaptan úzindiler jarııalady: «Túrmede kóretin de, isteıtin de eshteńe joq. Men La Santé-de joq tynyshtyqty umytyp ketemin (…). Ókinishke oraı, onda barlyq jer shýly».

Eshteńege qaramastan, burynǵy prezıdent kúsh-jigerin joǵaltpaǵan. Ol «Shóldegideı, túrmede de ishki jan dúnıe nyǵaıady» deıdi.

Túrmedegi bir tutqyn frantsýzdyq Le Point jýrnalyna Sarkozı týraly «jumyrtqany qalaı qaınatýdy da bilmeıtinin jáne ony jasaýdan túbegeıli bas tartatynyn» aıtty. Biraq eks-prezıdent kamerada tazalaq jumystaryn óz moınyna alǵan.

Sarkozı bostandyqqa shyqqannan keıin ózin "úlgili tutqyn" dep málimdedi. Ol qazir elektrondy bilezik kıip, polıtsııaǵa tekserýge baryp turady. Eks-prezıdent áli kúnge áıeli jáne qyzymen óziniń mıllıondaǵan dollarlyq úıinde turady. Onyń isi boıynsha protsess aıaqtalǵan joq. Eger onyń apellıatsııasy sátsiz bolsa, ol óz kitabyn kóptegen taraýlarmen tolyqtyra alady.

Aıta keteıik, Frantsııanyń eks-prezıdenti Nıkolıa Sarkozı 5 jylǵa bas bostandyǵynan aıyrylǵan bolatyn.

Sot 10 qarashada ony túrmeden bosatty. Alaıda bul onyń jazasyn ózgertpeıdi. Ol sot baqylaýynda bolady. Oǵan elden shyǵýǵa, is boıynsha kýágerlermen nemese ádilet mınıstrimen baılanysýǵa tyıym salynǵan.