Tutynýshylyq belsendiliktiń artýyn avtokólikterge qyzyǵýshylyqtyń qaıta jandanýy rastaıdy - UB

ASTANA. KAZINFORM – Óndiristik múmkindikter suranys ósimine ilese almaı otyr. Bul týraly Ulttyq bank tóraǵasy Tımýr Súleımenov aıtty.

- Tutynýshylyq belsendilik artyp keledi. Aldyńǵy aılarda biraz turaqty bolǵannan keıin sáýir aıynda qaıta kóterilgeni de baıqalady. Suranystyń ósýine tutynýshylyq kredıtteýdiń belsendi oryndalýy men naqty kiristerdiń qalypty ósýi sebep boldy. Tutynýdyń joǵary deńgeıi, ásirese, azyq-túlikke jatpaıtyn taýarlar segmentinde tólem kartalary boıynsha aınalymnyń ulǵaıýymen jáne bólshek saýdadaǵy taýar aınalymynyń jandanýymen rastaldy, - dedi Tımýr Súleımenov.

Onyń atap ótýinshe, tutynýshylyq belsendiliktiń artýyn rastaıtyn qosymsha faktor – iri satyp alýlarǵa, ásirese avtokólikterge degen qyzyǵýshylyqtyń qaıta jandanýy.

- Investıtsııalyq belsendilik te joǵary bolyp, qańtar-sáýir aılarynda 13,7 paıyzǵa ósti. Oǵan ınfraqurylymdyq jobalardy iske asyrýǵa baǵyttalǵan memlekettik ınvestıtsııalar, ásirese, Ulttyq qordan bólinetin transfertter edáýir úles qosty. Biz ekonomıkalyq belsendiliktiń ónimdiliktiń artýymen nyǵaıǵanyn quptaımyz. Alaıda óndiristik múmkindikter suranys ósimine ilese almaı otyr, - dedi UB basshysy.

Buǵan deıin Tımýr Súleımenov krıptovalıýtaǵa ınvestıtsııa salýǵa qatysty pikir bildirgen edi.