Tutynýshylarǵa 1,5 mlrd teńge qaıtaryldy
ASTANA. KAZINFORM – Tutynýshylardyń ótinishteri negizinde aýmaqtyq departamentter 776 tekserý júrgizdi. Tekserý nátıjesinde 892 ákimshilik is qozǵalyp, jalpy somasy 17,3 mln teńge kóleminde ákimshilik aıyppul salyndy.
2026 jyldyń birinshi jartyjyldyǵynyń qorytyndysy boıynsha júrgizilgen is-sharalardyń nátıjesinde tutynýshylardyń quqyqtary qorǵalyp, taýarlardy aıyrbastaý jáne qaıtarý arqyly jalpy somasy 1,5 mlrd teńge qaıtaryldy. Bul kórsetkish 2025 jyldyń birinshi jartyjyldyǵymen salystyrǵanda 15,3%-ǵa joǵary.
Ótinishterdi qaraý nátıjesinde 15 myń tutynýshynyń talaby qanaǵattandyrylyp, 15,4 myń tutynýshyǵa quqyqtyq kómek kórsetilip, konsýltatsııalar berildi. Al 12 myń tutynýshynyń máselesi quzyreti boıynsha qaraý úshin ýákiletti memlekettik organdarǵa joldandy.
Tutynýshylardyń ótinishteri negizinde aýmaqtyq departamentter 776 tekserý júrgizdi. Tekserý nátıjesinde 892 ákimshilik is qozǵalyp, jalpy somasy 17,3 mln teńge kóleminde ákimshilik aıyppul salyndy.
— Mańǵystaý oblysy boıynsha Saýda jáne tutynýshylardyń quqyqtaryn qorǵaý departamentiniń aralasýymen «Tuha Development» turǵyn úı-qurylys kooperatıvimen jasalǵan úlestik qatysý sharty boıynsha daý sotqa deıingi mámle arqyly sheshilip, tutynýshyǵa 14 mln teńgeden astam qarajat qaıtaryldy.
Shymkent qalasynda «Kanfar Bıýldıng» JShS-nen satyp alynǵan páterdegi kemshilikterge baılanysty júrgizilgen jumys nátıjesinde tutynýshyǵa 15,1 mln teńge qaıtaryldy.
Sondaı-aq rezonans týdyrǵan isterdiń biri — «Toyota Tsusho Kazakhstan Auto» JShS-nen Lexus LX 600 avtokóligin satyp alǵan tutynýshynyń ótinishi. Departamenttiń quqyqtyq súıemeldeýi nátıjesinde tutynýshyǵa 79 490 000 teńge kólemindegi qarajat tolyq kólemde qaıtaryldy, — delingen Saýda jáne ıntegratsııa mınıstrligi habarlamasynda.
Budan bólek, «Sapaly ónim» jobasy aıasynda sapasyz jáne qaýipti ónimderdi anyqtaý jumystarynyń qorytyndysy boıynsha 2026 jyldyń birinshi jartyjyldyǵynda zerttelgen 874 ónim túriniń 623 ataýynan zańnama talaptarynyń buzylýy anyqtaldy. Onyń 84%-y ónimdi tańbalaý talaptarynyń saqtalmaýyna, al 16%-y sanıtarııalyq-epıdemıologııalyq talaptardyń buzylýyna qatysty. Anyqtalǵan faktiler boıynsha 462 kásipkerlik sýbektisine qatysty qoldanystaǵy zańnamaǵa sáıkes sharalar qabyldandy.
