Tutynýshylardyń 400 mıllıon teńgeden astam qarajaty qaıtaryldy
ASTANA. KAZINFORM — Bıylǵy jyldyń alǵashqy úsh aıynda qazaqstandyqtarǵa 405 mln teńge kóleminde shyǵyn óteldi. Bul týraly OKQ alańynda ótken baspasóz konferentsııasynda QR Saýda jáne ıntegratsııa mınıstrligi Tutynýshylardyń quqyqtaryn qorǵaý komıtetiniń tóraǵasy Bolat Tanabergenov málimdedi.
Onyń málimetinshe, osy ýaqyt ishinde Komıtet pen aýmaqtyq departamentter 22 myńnan astam ótinishti qaraǵan. Byltyr osy kezeńde 14 myń ótinish tússe, bıyl shaǵym sany 152,7%-ǵa artqan.
Komıtet basshysy muny halyqtyń quqyqtyq saýatynyń artýymen túsindirdi.
— Aqparattyq-túsindirý jumystarynyń nátıjesinde azamattar óz quqyǵyn jaqsyraq bile bastady. Soǵan sáıkes tutynýshylar quqyǵyna qatysty ótinish sany da kóbeıdi, — dedi ol.
Shaǵymdardyń eń kóp úlesi — 38%-y (8,5 myń ótinish) bólshek saýda salasyna tıesili. Odan keıingi orynda 4,1 myń ótinishpen (18,3%) elektrondyq saýda tur. Sondaı-aq turmystyq qyzmet kórsetý salasyna — 2 myń, turǵyn úı-kommýnaldyq sharýashylyǵyna — 1,6 myń, al baılanys qyzmetine 704 shaǵym tirkelgen.
Budan bólek, azamattar týrızm, bilim berý, qoǵamdyq tamaqtaný, qarjy jáne kólik qyzmetterine de narazylyq bildirgen.
Qaralǵan ótinishterdiń nátıjesinde 7,3 myń adamnyń talaby qanaǵattandyrylǵan. Taǵy 7,2 myń azamatqa quqyqtyq kómek kórsetilip, túsindirý jumystary júrgizilgen. Sondaı-aq 5,7 myń ótinish quzyretine qaraı ózge memlekettik organdarǵa joldanǵan. Al 2,5 myń ótinish áli qaralyp jatyr nemese ótinish ıeleri tarapynan keri qaıtarylǵan.
Bolat Tanabergenov úsh aı ishinde kásipkerlik sýbektilerine 308 tekserý júrgizilgenin de atap ótti. Nátıjesinde zańbuzýshylyqtar anyqtalyp, 430 ákimshilik is qozǵaldy. Tártip buzǵan bıznes ókilderine jalpy somasy 12 mln teńge aıyppul salyndy.
— Júrgizilgen júıeli jumystardyń arqasynda úsh aıda tutynýshylarǵa 405 mln teńge qaıtaryldy. Bul qarajat negizinen sapasyz taýardy qaıtarý, aıyrbastaý jáne aýystyrý talaptary negizinde óteldi, — dedi komıtet tóraǵasy.
Aıta keteıik, buǵan deıin Almaty oblysynda tutynýshylarǵa 44 mln teńge qaıtarylǵanyn jazǵan edik.
