Tutynýshylar sany ósken: Qonaevta 4 jylytý qazandyǵy jańartylady

QONAEV. KAZINFORM - Qonaevta jylytý qazandyqtaryn jańartý josparlanyp otyr.

Qonaevtaǵy «Jylý ortalyǵynyń» ınjeneri Shamıl Gýmarovtyń aıtýynsha, oblys ortalyǵy mártebesin alǵan sátten bastap Qonaevta qurylys jandanyp, jylý energııasyn tutynýshylar sany ósken. 

- Osyǵan baılanysty jáne nysannyń qýatyn arttyrý úshin «Jylý ortalyǵy» kásiporny 4 bý qazandyǵyn aýystyrýǵa ótinim berdi. Nátıjesinde memlekettik satyp alý portaly arqyly tender ótkizilip, qazandyqtar satyp alyndy, – dedi ınjener.

Maman qazandyqtar 2025-2026 jyldardaǵy jylytý maýsymy bastalǵanǵa deıin ornatylatynyn atap ótti. Sondaı-aq Shamıl Gýmarov byltyr qalanyń 2, 4 jáne 5-yqsham aýdandaryndaǵy jylý júıeleri túgel aýystyrylǵanyn aıtty.

Aıta keteıik, búgingi kúni Qonaevta 31 255 abonent ortalyqtandyrylǵan jylytýǵa qosylǵan. «Jylý ortalyǵynda» 10 qazandyq bar: 6 bý jáne 4 sý jylytqysh. Onyń 5-i jumys istep tur, 4-i rezervte.

Eske salaıyq, buǵan deıin Qonaevta jańa temirjol stantsııasy salynýy múmkin ekenin jazǵanbyz.