Tutynýshy quqyǵyn qorǵaý týraly zań jobasy: qandaı jańa normalar endi

ASTANA. KAZINFORM — SIM Tutynýshylardyń quqyqtaryn qorǵaý komıtetiniń tóraǵasy Asqar Tynysbekov jańa zań jobasyna qandaı tyń normalar engenin aıtty.

— Zań jobasy Memleket basshysynyń tapsyrmasymen áleýmettik zertteýlerdiń, qoǵam ókilderiniń shaǵymdaryna jasalǵan monıtorıng pen saraptamalardyń nátıjelerine, qoǵamdyq ınstıtýttardyń usynystary men pikirlerine súıene otyryp jasaldy. Ótken jyldyń 4 qyrkúıeginde ony Májilis depýtattary birinshi oqylymda maquldady, — dedi ol OKQ alańynda.

Spıkerdiń aıtýynsha, jańa zańda birqatar jańalyq bar. Atap aıtqanda myna baǵyttarda jańa normalar engizildi: 

— Qorǵanys tásilderin erkin tańdaý jáne tutynýshylardyń shaǵym túsirýin jeńildetý (kedergiler men bıýrokratııalyq satylar alynyp tastaldy);
— Tutynýshylardyń quqyqtaryn qorǵaý jónindegi qoǵamdyq ınstıtýttardyń rólin kúsheıtý, sonyń ishinde osy salada Ombýdsmen ınstıtýtyn engizý;
— Adam ómiriniń barlyq salasynda keshendi qorǵaýdyń negizgi qaǵıdattaryn keńeıtý;
— Kásipkerdiń azamattyq-quqyqtyq jaýapkershiligin engizý (óndirilgen talap somasynyń 10%-dan 50%-ǵa deıingi mólsherinde aıyppul engizý), ony sot azamattyq protsess aıasynda tutynýshynyń paıdasyna óndiredi;
— Onlaın saýdadaǵy tutynýshylardyń quqyqtaryn qorǵaýdy kúsheıtý jáne basqa normalar.

Buǵan deıin elimizde tutynýshylar quqyǵyn qorǵaý ombýdsmeni ınstıtýty qurylatynyn jazdyq. 

Sondaı-aq, tutynýshy endi shaǵymdanýdyń mindetti 4 satysynan ótpeı, birden sotqa aryzdana alady. 

Marketpleısterge de jaýapkershilik júkteletin bolady.