Tutynýshy quqyǵyn buzǵan kásipker aıyppul tóleýi múmkin
Elimizde tutynýshynyń quqyǵyn buzǵan kásipkerge sotpen aıyppul salý usynyldy. Bul týraly Májilistiń Ekonomıkalyq reforma jáne óńirlik damý komıtetiniń otyrysynda Saýda jáne ıntegratsııa vıtse-mınıstri Qaırat Balyqbaev aıtty, dep habarlaıdy QazAqparat tilshisi.
«Qoldanystaǵy Zań salalyq zańdarmen rettelgen qarjylyq, áleýmettik, medıtsınalyq, týrıstik jáne ózge de qyzmetter salalaryndaǵy tutynýshylardyń quqyǵyn qorǵaýda qoldanylmaıdy. Nátıjesinde sottar Zańnyń 2-babyna silteme jasaı otyryp, tutynýshylardyń quqyǵyn qorǵaý týraly normalaryn negizge almaıdy. Keıinnen olardyń quqyqtary men zańdy múddeleri buzylyp, áleýmettik táýekelder týyndaıdy.
Adam ómiriniń barlyq salalarynda tutynýshylardyń quqyqtaryn qorǵaý qaǵıdalaryn turǵyn úı-kommýnaldyq tutyný, baılanys, týrızm, mádenıet, saýda, kólik jáne tutyný úshin kórsetiletin qyzmetterdiń ózge de salalarynda qoldaný usynylady», – dedi ol «Tutynýshylardyń quqyqtaryn qorǵaý týraly» zań jobasynyń jáne oǵan ilespe zań jobasynyń tanystyrylymy barysynda.
Onyń atap ótýinshe, kásipkerge aıyppul túrinde sotpen azamattyq-quqyqtyq jaýapkershilik engizý usynylyp otyr.
«Aıyppul mólsheri tutynýshynyń talap qoıý somasynyń 10 paıyzdan 50 paıyzyna deıin quraıdy. Shaǵym somasy neǵurlym az bolsa, aıyppul mólsheri joǵaryda kórsetilgendeı bolady. Oń tustary – kásipkerlerdi sotqa deıingi kezeńde buzýshylyqtardy óz erkimen joıýǵa yntalandyrady. Sebebi aıyppul tólemes úshin kásipker tutynýshymen kelisimge kelýge tyrysady. Klıenttiń qajettilikterine baǵdarlanady. Qoǵamdyq monıtorıngti damytýǵa jáne órkenıettik naryqtyq ekonomıkany qurýǵa yntalandyrady. Keı kezderi medıatorǵa júginý úshin tutynýshy aqsha tóleý kerek. Ol aqshasy bolmaı qalatyn jaǵdaı da bar. Aıyppul engizgennen keıin sol aıyppuldy medıatorǵa bere alady», – dedi Qaırat Balyqbaev.
