Tutynýshy quqyǵy: Taýarǵa kóńili tolmaǵan aqtóbelikter 100 mln teńge aqshasyn qaıtaryp alǵan
AQTÓBE. KAZINFORM - Aqtóbelik tutynýshylardan departamentke 900-ge jýyq ótinish tústi. Olar satyp alǵan taýar baǵasyna, qyzmetke kóńili tolmaı, aqshasyn keri qaıtarýdy talap etken.
Aqtóbe oblysy boıynsha saýda jáne tutynýshylardyń quqyqtaryn qorǵaý departamentine bıyl 8 aıda 861 ótinish tústi. Bul byltyrǵy jyldyń dál osy aralyǵymen salystyrǵanda 49 ótinishke kóp. Tutynýshylardyń basym bóligi bólshek saýda men elektrondy satýǵa kóńili tolmaǵan.
- Elektrondy saýda salasyndaǵy shaǵym byltyrǵymen salystyrǵanda 41 ótinishke ósti. Kóbine taýardy aıyrbastamaı, aqshany keri qaıtarýdan bas tartqan. Saıt arqyly tapsyrys bergende sapasyz taýar usyný jáne kelisilgen jetkizý merzimin saqtamaý deregi tirkelgen. Shaǵymnyń basym bóligi oryndy, onyń 495-i qanaǵattanarlyq bolyp sheshildi, - dedi Aqtóbe oblysy boıynsha saýda jáne tutynýshylardyń quqyqtaryn qorǵaý departamenti basshysynyń orynbasary Baǵjan Tilegenov.
Bıyl 200-ge jýyq ótinish ıesine quqyqtyq kómek kórsetildi. 8 aıda 114,3 mln teńge aqsha tutynýshyǵa qaıtaryldy.
- Jyl basynan beri departament mamandary 41 sot otyrysyna qatysty. 50 tutynýshynyń 69,7 mln teńge aqshasyn qaıtarý týraly sot sheshimi shyqty. Jeke kásipkerlik sýbektilerine barlyǵy 231 qaýly shyǵaryldy. Onyń ishinde 38-i tutynýshy quqyǵyn buzý, 193-i saýda qyzmetin saqtamaý deregi. 156 kásipkerge eskertý berilip, 75 sýbektige 1,4 mln tg aıyppul salyndy. Olardan áleýmettik mańyzy bar taýarlardyń saýda ústemeaqysyn 15 paıyzdan asyrý, taýar baǵasy kassadaǵy baǵaǵa sáıkes kelmeýi jáne baǵa belgileriniń bolmaýy derekteri anyqtaldy,- dedi Baǵjan Tilegenov.
Aıta keteıik, Aqtóbe oblysynda Turaqtandyrý qorynyń aınalym qarjysy 1,9 mlrd teńgeniń qurap otyr. Bıyl kúzde de jergilikti taýar óndirýshilerden kókónis alynady.
