Tutynýshy quqyǵy qorǵalyp jatyr dep aıta almaımyz – Tursyn Jaǵyparova
ASTANA. KAZINFORM — Qazaqstanda tutynýshylardyń quqyǵy qorǵalyp jatqan joq. Kazinform tilshisine bergen suhbatynda «Sapa» tutynýshylar quqyqtaryn qorǵaý jónindegi ulttyq uıym» qoǵamdyq birlesti tóraǵasynyń orynbasary Tursyn Jaǵyparova osylaı dep pikir bildirdi. Oǵan sońǵy kezde tutynýshylardan túsetin tolassyz shaǵym dálel ekenin aıtady.
– Qazaqstanda tutynýshylardyń quqyǵy qorǵalyp jatyr dep aıta almaımyz. Elimizde mınıstrlikter kóp bolǵanymen, naqty tutynýshylardyń quqyǵyn tıimdi qorǵaıtyn vedomstvo joq. Saýda jáne ıntegratsııa mınıstrligi tek sandardy aıtýmen shekteledi, shyn máninde naqty jumys júrgizip jatqan joq, - deıdi táýelsiz sarapshy.
Sońǵy 15 jylda kásipkerler zańdy durys túsinbeı, dańdaısyp ketkenin aıtady.
– Tutynýshylardan shaǵym kóptep túsip jatyr. Sońǵy 15 jylda Qazaqstan kásipkerlerdi qoldaýǵa baǵyttalǵan saıasat júrgizdi. Aıyppul mólsheri tómendetildi, birneshe ret moratorıı jarııalandy, túrli múmkindikter usynyldy. Biraq ókinishke qaraı, kásipkerlerdiń basym bóligi, shamamen 80%-dan astamy bul saıasatty durys túsinbeı, 90-jyldardyń saýda ádisine qaıta oraldy. Olardyń basty maqsaty – taýardy qalaıda satý. Sapa, zańdylyq – ekinshi orynda. Sapasyz, jalǵan ónimder kóptep satylyp jatyr, - deıdi ol.
Sarapshynyń aıtýynsha, qazirgi kásipkerler taýardyń sapasyna qaraǵanda jarnamasyna kóp kóńil bóledi.
– Kásipkerler arasynda bilim de jetispeıdi. Olar ádemi jarnamalaýdy úırenip alǵan. Tutynýshynyń nazaryn aýdaryp, ónimdi satýmen aınalysady. Al ónimge qatysty másele týyndasa, jaýapkershilik alǵysy kelmeıdi. Maǵan keletin tutynýshylardyń kóbisi «Jarnamasy keremet boldy. Aqshany qaıtarǵymyz kelse, bermeı jatyr» dep shaǵymdanady, - deıdi Tursyn Jaǵyparova.
«Sapa» Tutynýshylar quqyqtaryn qorǵaý jónindegi ulttyq uıym» qoǵamdyq birlesti tóraǵasynyń orynbasary pandemııadan keıin onlaın saýda qarqyndy damyp, jaǵdaıdy odan saıyn qıyndatqanyn jetkizdi.
– Pandemııa onlaın saýdanyń qarqyndy damýyna sebep boldy. Alaıda elimizdiń zańnamasy bul ózgeriske daıyn bolmady. Qazir onlaın saýdaǵa baılanysty shaǵymdar óte kóp, biraq sol shaǵymdardy qarap, naqty sheshim shyǵaratyn organ joq. Sondyqtan búgingi kúni Qazaqstanda tutynýshylardyń quqyǵy tolyqqandy qorǵalyp jatyr dep aıta almaımyn, - deıdi.
Aıta keteıik, 2024 jyly Qazaqstanda elektrondyq saýda naryǵy 3,1 trln teńgeden asty. Onyń 85 paıyzǵa jýyǵy marketpleıster úlesine tıesili.