Tútegen shańdy daýyldan keıin júzdegen elordalyq TJD kómegine júginýge májbúr boldy
ASTANA. QazAqparat - Keshe keshkisin elordalyqtardy ábigerge salǵan tútegen shańdy daýyldan keıin júzdegen qala turǵyny tótenshe jaǵdaılar departamenti kómegine júginýge májbúr boldy. Bul jaıynda QazAqparat tilshisine Astana qalalyq TJD baspasóz qyzmetinen málim etti.
«Keshe keshki saǵat 7-den 10-ǵa deıin Astana qalalyq TJD kezekshi qyzmetine elorda turǵyndarynan 300-den astam qońyraý kelip tústi. Onyń basym bóligi elektr energııasy jelileriniń úzilýine qatysty boldy. Oqıǵa oryndaryna ortalyq jáne óńirlik aeromobıldi jasaqtar jedel attandyrylyp otyrdy. Zardap shekkender men qaza tapqandar joq. Biz daýyl turatyny jaıynda aldyn ala aqparat bergen edik. Jyldamdyǵy sekýndyna 27 metrge jetken kúshti jel №64 mekteptiń 40 sharshy metr shatyryn julyp ketti», - dedi TJD ókili Aıagóz Fazylova.
Sonymen qatar onyń atap ótýinshe, elorda aýdandarynyń birinde ústine aǵash qulaǵan kólik búlingen. «Búginge daýyl turatyndyǵy jaıynda aqparat Qazgıdrometten túsken joq. Biz ahýaldy jiti baqylap otyrmyz», - deıdi ol.
