Tústi metallýrgııada eńbek ónimdiligi eselep artty
ASTANA. QazAqparat - Tórt jylda tústi metallýrgııada eńbek ónimdiligi eselep artty, dep habarlaıdy QazAqparat.
Búgin QR Investıtsııalar jáne damý vıtse-mınıstri Roman Sklıar Májiliste ótken «dóńgelek ústelde» 2016 jylda mınıstrliktiń strategııalyq jospardy júzege asyrý qorytyndysy týraly baıandady.
«2015-2019 jyldarǵa arnalǵan IID memlekettik baǵdarlamasynda belgilengen ónerkásiptik basymdyqty salalarda eńbek ónimdiligi boıynsha barlyq josparly mánder oryndaldy»,-dedi Sklıar.
Sonymen birge QR IDM málimetterine súıensek, «Qara jáne tústi metallýrgııanyń eńbek ónimdiligi» ındıkatory boıynsha qara metallýrgııada eńbek ónimdiligi 2012 jyldaǵy deńgeıge qaraǵanda ótken jyly 248,6 paıyzdy qurady. Josparly mán 108,7 paıyz kóleminde qalyptasty. Atap aıtqanda, bir adamǵa shaqqanda eńbek ónimdigi 70,5 myń AQSh dollaryn qurady.
Al tústi metallýrgııada atalǵan merzimde ónimdilik 449,1 paıyzdy qamtydy. Bul turǵyda bir adamǵa shaqqandaǵy eńbek ónimdiligi 119,6 myń dollarǵa jetti.
R. Sklıar óz baıandamasynda Strategııalyq jospardyń 51 maqsatty ındıkatorynyń ishinen 2016 jyldyń qorytyndysy boıynsha josparly mánge 45-i jetkizilgendigin nemese 88 paıyzy oryndalǵandyǵyn atap ótti. Osy oraıda maqsatty 20 ındıkator turǵysynda sońǵy naqtylanǵan málimetter 2017 jyldyń ekinshi jáne úshinshi toqsandarynda belgili bolady.
