Túsinistik tanytýdy suraımyz: Shymkent áýejaıynda terrorızmge qarsy jattyǵýlar ótip jatyr
ShYMKENT. KAZINFORM — Áýejaı aýmaǵynda áýe jáne avtokólik qozǵalysyna qandaı da bir shekteýler kózdelmegen.
Shymkent qalasyndaǵy halyqaralyq áýejaıda termınal ishindegi barlaý qyzmetterin qorshap turǵan kórinis beınelengen vıdeo jolaýshylardy alańdatty. Kýágerler kadrlardy Kazinform redaktsııasyna jiberdi.
Belgili bolǵandaı, áýejaı aýmaǵynda yqtımal qaýipter jaǵdaıynda kúsh qurylymdarynyń is-áreketke daıyndyǵyn tekserýge baǵyttalǵan terrorızmge qarsy josparly oqý-jattyǵýlar ótkizilip jatyr.
Shymkent qalalyq Polıtsııa departamentiniń habarlaýynsha, oqý-jattyǵýǵa polıtsııanyń, arnaıy bólimshelerdiń, avıatsııalyq qaýipsizdik qyzmetiniń, órt-qutqarý bólimsheleriniń jáne medıtsınalyq qyzmetterdiń kúshteri men quraldary jumyldyryldy. Sondaı-aq shartty quqyq buzýshyny beıtaraptandyrý, adamdardy evakýatsııalaý jáne obektiniń qaýipsizdigin qamtamasyz etý boıynsha stsenarıılerdi pysyqtaý úshin qajetti mamandandyrylǵan tehnıka paıdalanyldy.
Qalalyq terrorızmge qarsy kúres jónindegi jedel shtabtyń málimetinshe, oqý-jattyǵý barysynda shekteý sharalary, onyń ishinde avtokólik qozǵalysy qarastyrylǵan.
Osy oraıda, resmı organdar tek tekserilgen aqparat kózderine nazar aýdarýdy suraıdy.
— Qala turǵyndary men qonaqtarynan sabyrlyq tanytýǵa, qaýipsizdik sharalaryn saqtaýǵa jáne jumyldyrylǵan qyzmet qyzmetkerleriniń zańdy talaptaryn oryndaýǵa shaqyramyz, — delingen qalalyq terrorızmge qarsy kúres jónindegi jedel shtabtyń habarlamasynda.
Budan buryn Astana halyqaralyq áýejaıynda terrorızmge qarsy jattyǵýlar ótkenin jazǵan edik.