Túsik jáne ýaqytynan buryn bosanýdyń sebebi nede

ALMATY. KAZINFORM — Ózdiginen túsik tastaý — tabıǵı qubylys, medıtsınalyq nemese hırýrgııalyq túsikke jatpaıdy. Bul týraly Kazinform agenttiginiń tilshisine akýsher-gınekolog Gúljahan Jumadýllaeva aıtty.

Almaty oblystyq akýsherlik gınekologııa jáne perınatologııa ortalyǵynyń dırektory Gúljahan Jumadýllaevanyń aıtýynsha, ózdiginen túsik tastaý — júktiliktiń 20-shy aptasyna deıin uryqty ózdiginen joǵaltý.

Al, júktiliktiń 20-shy aptasynan keıin bul mezgilinen buryn bosanýǵa jatady.

— Birinshi trımestrde bolatyn barlyq túsiktiń jartysyna jýyǵy ata-ananyń uryǵynda nemese jumyrtqasynda tuqym qýalaıtyn nemese ózdiginen bolýy múmkin hromosomalyq aýytqýlardan týyndaıdy. Hromosomalar — tuqym qýalaýshylyqtyń negizgi birlikteri. Ol genderdi alyp júretin dene jasýshalarynyń ishindegi kishkentaı qurylymdar. Gender adamnyń barlyq fızıkalyq qasıetin anyqtaıdy, mysaly, jynys, shash jáne kózdiń túsi jáne qan toby. Hromosomalyq máselelerdiń kezdeısoq paıda bolady jáne ata-ananyń densaýlyǵyna baılanysty emes. Sondaı-aq áıeldiń ózine baılanysty, eger aıaǵy aýyr kelinshek densaýlyǵyna nemquraıly qaraıtyn bolsa, durys tamaqtanbasa júktiliktiń alǵashqy aptalarynda túsik tastaýy múmkin, — dep túsindirdi dáriger.

Jatyr moınynyń jetkiliksizdigi — júktiliktiń merziminen buryn aıaqtalýyna ákeledi.

— Merziminen buryn bosanýdyń 60-70 paıyzy jatyr moınynyń jetkiliksizdiginen bolady. Bul eń aldymen qyz balanyń ósip jetilýine baılanysty. Eger jasósipirim kezinde bakterııalyq nemese vırýstyq aýrýlarmen aýyrsa, ol áıeldiń gormonaldyq júıesi durys jetilmeıdi. Mundaı kezde jatyr moıny ashylyp ketip, ýaqytynan buryn sýy ketedi, tolǵaq bastalady da bala merziminen buryn týady, — deıdi Gúljahan Jumadýllaeva.

Maman júktilikti josparlaý kerektigin tilge tıek etti.

Eske salaıyq, buǵan deıin Almaty dárigerleri baýyry zaqymdanǵan júkti áıeldi aman alyp qalǵan bolatyn.