Týsk Krakovtaǵy atysty terakt dep atady
ASTANA.KAZINFORM — Polsha premer-mınıstri Donald Týsk Krakov qalasynyń ortalyǵynda bolǵan, saldarynan bes adam qaza tapqan atysty terakt dep atady, dep habarlaıdy TASS.
- Іshki ister mınıstri Krakovta bolǵan qaıǵyly atystan keıingi jaǵdaı týraly maǵan turaqty túrde aqparat berip otyr. Polıtsııa teraktiniń sebepteri men barlyq mán-jaıyn anyqtap jatyr, – dep jazdy Donald Týsk H áleýmettik jelisinde.
Agenttiktiń málimetinshe, oqıǵa ornyna Polsha ishki ister mınıstri Marchın Kervınskıı bara jatyr.
Atys 7 qarasha kúni jergilikti ýaqyt boıynsha saǵat 15:00 shamasynda Krakovtyń Bas bazar alańynda bolǵan. Er adam júrip bara jatqan kólikten kezdeısoq ótip bara jatqan adamdarǵa oq atqan.
Sońǵy málimet boıynsha, bes adam qaza taýyp, birneshe adam jaraqat alǵan. Zardap shekkenderdiń arasynda polıtsııa qyzmetkerleri de bar.
Kúdikti ustaý kezinde jaralanyp, aýrýhanaǵa jetkizildi. Quqyq qorǵaý organdary shabýyldyń mán-jaıy men sebepterin anyqtap jatyr.
Buǵan deıin Krakov ortalyǵyndaǵy atys saldarynan eki adam qaza taýyp, taǵy on adam jaraqat alǵany, olardyń arasynda eki polıtsııa qyzmetkeri bary habarlanǵan edi.