Túsinispeýshiliktiń sońy osyǵan ákeldi - Serik Sápıev AІVA-nyń HOK músheliginen shyǵarylýy jaıly

NUR-SULTAN. QazAqparat - QR Mádenıet jáne sport mınıstrligi sport jáne dene shynyqtyrý komıtetiniń tóraǵasy Serik Sápıev AІVA-nyń Halyqaralyq Olımpıada komıtetiniń músheliginen shyǵarylýyna qatysty pikir bildirdi, dep habarlaıdy QazAqpara tilshisi.

«Halyqaralyq boks federatsııasynyń (AІVA) óz ishindegi kelispeýshilik, túsinispeýshiliktiń aqyry osyǵan alyp keldi. Meniń oıymsha, AІVA óz ishindegi qandaı da bir ishki qarama-qaıshylyqty, bálkim saıası teketiresti retteýi kerek. Ortaq paıymǵa kelip, boksty damytýy tıis. Álbette, bári de bokstyń Olımpıada oıyndarynyń quramynda bolǵanyn qalaıdy. Barlyq federatsııalar arasyndaǵy qarym-qatynas rettelýi tıis», - dedi Serik Sápıev bodıbıldıngten elordada ótetin Orta Azııa chempıonatyna arnalǵan baspasóz máslıhatynan keıin QazAqparat tilshisine.

Komıtet tóraǵasy óz sózinde boks - eń qyzyqty sport túrleriniń biri ekenin atap ótti.

«Ony Olımpıadadan alyp tastaý álbette, qıyn bolady. Bári de Halyqaralyq Olımpıada komıtetiniń qolynda. Biraq, meniń oıymsha, AІVA boksty damytý úshin qolynan kelgenniń bárin jasaýy tıis. Boksty Olımpıada oıyndary qatarynda saqtap qalý úshin barlyq elderdiń boks federatsııalary men HOK-tyń ustanymdary eskerilýi kerek. Bárimiz de boksty saqtap qalý kerektigin túsinip otyrmyz», - deıdi Serik Sápıev.

Eske sala ketsek, Halyqaralyq boks qaýymdastyǵyn (AІVA) Halyqaralyq Olımpıada komıtetiniń músheliginen shyǵaryp jibergen bolatyn.