Tushpara jasaıtyn tseh ashqan áıel: Aýylda da jeke kásibińdi dóńgeletýge bolady
ÓSKEMEN. KAZINFORM — ShQO Kúrshim aýdanynyń turǵyny Raıhan Nurǵazınova tushpara men mantyny jasaýdy kásipke aınaldyryp, aýylda shaǵyn tseh ashqan. Búginde onyń túrli tamaq ónimderine aýdan boıynsha suranys joǵary. Kazinform tilshisi ony áńgimege tartyp, aýylda jeke kásipti qalaı dóńgeletýge bolatynyn surap kórdi.
— Tushpara jasaıtyn tseh ashý ıdeıasy qalaı keldi?
— Bala kútimine baılanysty úıde otyrǵan kezimde joldasym jalǵyz ózi jumys istep júrdi. Kúıeýimniń bir jaǵyna shyǵysyp, kómekteseıin degen nıetpen úıde otyryp tushpara túıip, aýyldaǵy dúkenderge ótkize bastadym. Ol kezde tuńǵyshymyz 1-ge endi tolǵan. Saýda jaqsy júrdi. Qamyryn juqa etip, etin molynan salǵandyqtan turaqty túrde tapsyrys beretinder paıda boldy. Halyqtyń oń baǵasyn alǵan saıyn qulshynysym da arta berdi.
Bir kúni tanystarymnan «Aýyl amanaty» baǵdarlamasy týraly estip qaldym. Baıqap kóreıin dep kerek qujattardy jınap, baǵdarlamaǵa qatysý úshin ótkizdim. Jolym bolyp, úıimizdi kepilge qoıyp, 2,5 paıyzben 5 mln teńge nesıe aldym. Sóıtip, «AREMA» atty jartylaı fabrıkattar tsehyn ashtyq.
— Ataýyn ne sebepti solaı qoıdyńyzdar?
— Biz jubaıym ekeýimiz 3 bala tárbıelep otyrmyz. Otbasymyzdaǵy ár adam atynyń birinshi árpin alǵanda AREMA degen sóz shyqty: Adı, Raıhan, Ermahan, Mırat, Aıarý. Sol úshin tseh ataýyn únemi tek bas áriptermen jazamyz. Úlken ulymyz Adı 15-te, qyzymyz Aıarý 10-da, kenjemiz Ermahan 6 jasta.
— Assortımentte tushparadan basqa taǵy qandaı ónimder bar?
— Túshpara, manty, kotlet, teftelı, varenıkı jasaımyz. Aldaǵy ýaqytta «bórek» deıtin taǵam túrin qosqymyz keledi. Juqa qamyrǵa orap pisiriletin bul qytyrlaq taǵamdy da satyp alýshylar kóp bolady degen senimdemin.
— Ónimderińiz qaı aýyldarda satylady?
— Kúrshim aýdanynyń ortalyǵyndaǵy 12 dúkende jáne 2 aýyldaǵy saýda oryndarynda ónimderimiz satylady.
— Tsehta qazir qansha adam jumys isteıdi? Jumysshylardy qandaı krıterıı boıynsha qabyldaısyz?
— Ázirge 3 adamdy jumyspen qamtyp otyrmyn. Jumysqa adam alǵan kezde qoıar basty talabym — tazalyq pen adaldyq. Aldaǵy ýaqytta taǵy bir-eki jumys ornyn ashsam degen oıym bar.
— Joldasyńyz kásibińizge qanshalyqty kómektesedi?
— Kúıeýim Mırat áskerı salada qyzmet etedi. Jumysy qaýyrt. Biraq qoly qalt ete qalǵanda únemi qasymda. Árkez kómektesip, qoldap júredi.
— Etti qaıdan alasyzdar?
— Jartylaı fabrıkattardy daıyndaýǵa qajetti shıkizatty kóbine óz aýylymyzdaǵy kásipkerlerden alamyn. Aýylda mal ustaıtyn, et ónimderimen aınalysatyn azamattar az emes. Sonyń arasynan ózim bir sharýa qojalyq ıesinen turaqty túrde mal alyp turamyn. Ony soıyp, daıyndap bizge ákelip beredi. Taǵamnyń dámdi bolýy etine baılanysty ǵoı. Sondyqtan durys et tańdaý — óte mańyzdy.
— Ásirese qaı mezgilde kóbirek suranys bolady?
— Bizdiń ónimderge suranys jyl boıy bola beredi. Biraq ásirese elde soǵym eti azaıǵan kezde, jaz aılarynda suranys kóbeıe túsedi.
— Kásibińizdi damyta túsýge qatysty aldaǵy jyldarǵa qandaı josparyńyz bar?
— Aldaǵy ýaqytta jartylaı fabrıkattar tsehyn úlkeıte túskim keledi. Ónimderimizdiń assortımentin kóbeıtip, sapasyn álde de jaqsartý sııaqty josparlarym bar.
— Jeke kásippen aınalysqysy kelip júrgen názik jandylarǵa qandaı aqyl-keńes aıtasyz?
— Jeke isin bastaǵysy kelgen áıelderge aıtarym: bir isti qolǵa alarda jospar quryp alyńyzdar. Sodan soń ol jospardy iske asyrý úshin jasqanbaı táýekel ete bilińizder. Qandaı jaǵdaı bolmasyn bastaǵan sharýany jol ortada tastap ketpeı, tózimdilik tanytý qajet. Qala bolsyn, aýyl bolsyn óz kásibińizdi dóńgeletýge bolady. Bári ózińizge baılanysty.
— Áńgimeńizge kóp rahmet!
Eske salsaq, buǵan deıin Óskemende avtobýs róline otyryp, jolaýshylardy dittegen jerlerine jarty jyldan asa ýaqyt jetkizip júrgenine Álııa Ahmoldına jaıly jazǵanbyz.