Týrzım: Baıqońyr keshenine ruqsat alý merzimi qysqardy
ASTANA. KAZINFORM — Baıqońyr kesheninde týrızmdi damytýǵa ınvestıtsııa salý kerek. Bul týraly Úkimet otyrysynda QR Týrızm jáne sport mınıstri Erbol Myrzabosynov málim etti.
— Elimizdegi biregeı týrıstik baǵyttarynyń biri — álemdegi alǵashqy ári eń iri ǵarysh aılaǵy Baıqońyr kesheni. Baıqońyr kesheninde týrızmdi damytýdyń 2030 jylǵa deıingi tujyrymdamasy bekitildi. Ony iske asyrý aıasynda sheteldik týrıster úshin ruqsat alý merzimi 10 kúnge deıin qysqartyldy. Bul keshenniń qoljetimdiligin arttyrdy, — dedi E. Myrzabosynov.
Onyń aıtýynsha, Gagarın start alańy, montajdaý-maı quıý kesheni jáne dınamıkalyq synaqtar stendi joǵary týrıstik áleýetke ıe. Alaıda olardy jańǵyrtý kerek jáne qomaqty ınvestıtsııa salý qajet. Áleýetti ınvestorlar úshin tızerler ázirlendi.
— Sonymen qatar ol jerde oqıǵalyq týrızmdi damytý mańyzdy. Bul týrıster aǵynyn jyl boıy qamtamasyz etip, qoldanystaǵy ınfraqurylymdy tıimdi paıdalanýǵa múmkindik beredi, — dedi mınıstr.
Buǵan deıin týrızm salasynda 600 myńnan astam adam jumyspen qamtylǵanyn jazǵan edik.
