Turýǵa yqtııarhat ala almaǵan aljırlik Rýandaǵy sınagogany órtep jibermek boldy

ASTANA. KAZINFORM — Polıtseıler Rýandaǵy sınagogany órteýge árekettengen qarýly adamdy atyp óltirdi. Onyń jeke basy anyqtalyp, 29 jastaǵy aljırlik ekeni naqtylandy, dep jazady Euronews.

Frantsııanyń quqyq qorǵaý organdary Rýandaǵy sınagogaǵa ot jaǵýǵa árekettengen adamnyń kim ekenin anyqtady. Shabýyldaýshyny polıtsııa qyzmetkeri ólimshi etip jaralady.

Rýan prokýrorynyń aıtýynsha, antısemıttik áreketti eki jyl buryn turýǵa yqtııarhat ala almaǵan 29 jastaǵy aljırlik azamat jasaǵan. Ol apellıatsııalyq shaǵym túsirgenimen, ótinishi qanaǵattandyrylmaǵan. Er adam ústimizdegi jyldyń qańtar aıynan beri izdeýde bolǵan.

Eldiń ishki ister mınıstri Jerald Darmanen X áleýmettik jelisinde polıtsııaǵa shuǵyl áreket etkeni úshin alǵys bildirdi.

Frantsýz aqparat quraldarynyń polıtsııa derekkózderine silteme jasap habarlaýynsha, tártip saqshylary «sınagoga mańyndaǵy tútinge eleń etip, birden jetken».