Túrtip qalsań, opyrylady: Jezqazǵan turǵyndary jol jóndeý sapasyna syn aıtty
JEZQAZǴAN. KAZINFORM — Jezqazǵanda kommýnaldyq jelilerdi jóndeý kezinde buzylǵan trotýarlardy qalpyna keltirý jumystary turǵyndardyń narazylyǵyn týǵyzdy. Qalalyq qoǵamdyq keńes músheleri Janasov kóshesin tekserý barysynda asfalt tóseý tehnologııasynyń talaptary saqtalmaǵanyn anyqtady.
Qoǵamdyq keńes ókilderi jylý qubyrlaryn aýystyrý jumystary aıaqtalǵannan keıin merdiger uıymnyń trotýarlardy qalpyna keltirý sapasyn teksergen. Qubyrlardy jóndeý barysynda jaıaý júrginshiler jolynyń birqatar bóligi buzylǵan: keı jerlerde asfalt jabyny alyp tastalsa, endi bir ýchaskelerde tósemtastar buzylǵan. Jumys aıaqtalǵan soń merdiger uıym búlingen aýmaqtardy qaıta qalpyna keltirýge tıis bolǵan.
Alaıda qoǵamdyq keńes músheleri jumys nátıjesine kóńili tolmaıtynyn jetkizdi. Olardyń aıtýynsha, keıbir tusta asfalt tóseler aldynda mindetti túrde sebilýge tıis negiz durys ázirlenbegen. Sonyń saldarynan jabyn qurylys tehnologııasynyń talaptaryna múldem saı kelmeıdi.
— Jabynnyń qalaı tóselgenine qarap-aq, jumysty kásibı mamandar atqarmaǵanyn ańǵarýǵa bolady. Trotýarǵa asfalt arnaıy tehnıka qoldanylmaı, qalaı bolsa solaı tóselgen. Onyń ústine, tósemniń negizi múlde daıyndalmaǵan: qıyrshyq tas tóselmegen, betki qabaty arnaıy qospamen óńdelmegen. Asfalt shań men jalańash topyraqtyń ústine tóselgen. Sondyqtan ol negizge jabyspaıdy. Biz jabyndy kóterip kórgende, asfalttyń shańymen birge ilesip kóteriletinin baıqadyq, — dedi qoǵamdyq keńes ókilderi.
Jezqazǵan qalasynyń ákimdigi bul beınejazba shamamen eki apta buryn túsirilgenin habarlady. Ákimdik sol kezde asfalt tóseý jumystarynyń kólemi men sapasy belgilengen tehnologııalyq talaptarǵa sáıkes kelmegenin rastady. Osyǵan baılanysty merdiger uıymnyń jumysy qabyldanbaǵan.
— Qazirgi ýaqytta anyqtalǵan barlyq kemshilik joıylyp, jol jabyny belgilengen talaptarǵa sáıkestendirildi, — dep habarlady qala ákimdigi.
Buǵan deıin uzyndyǵy 457 shaqyrym bolatyn «Qaraǵandy — Jezqazǵan» avtojolynyń qurylysy qarqyn alyp kele jatqanyn habarlanǵanbyz.
