Tursynbek Qabatovqa Astana ákiminiń qurmet marapaty tabystaldy
Astanada jyl saıyn qyrkúıek aıynda Qazaqstan halqy tilderiniń qalalyq festıvali uıymdastyrylyp, shara aıasynda barlyq mekemelerde bir aı boıy túrli is-sharalar ótkiziledi.
«Meniń tilim - uly dala rýhy» taqyrybyndaǵy festıvaldi elorda ákimdigi bıyl 19-shy ret ótkizip otyr. Til festıvaliniń basty maqsaty - qazaq tiliniń qoldaný aıasyn keńeıtýge yqpal etý, kópultty memleketimizdiń birligi men dostyǵyn nasıhattaý jáne onyń faktory retinde memlekettik tildiń rólin arttyrý, jastardy patrıottyqqa baǵyttaý.
«Búgin bizdiń shaharda úlken mereke bolyp jatyr. Ol - til merekesi. Elbasymyz Nursultan Nazarbaev óziniń «Rýhanı jańǵyrý» maqalasynda el irgesiniń bekýindegi tildiń mańyzyn erekshe atap ótken bolatyn. Til bizdiń ulttyq memlekettigimizdiń, eldigimizdiń, mádenıetimizdiń bastaýy. Máńgilik elimiz jasasyn! Máńgilik tilimiz jasasyn! - dedi qalalyq Tilderdi damytý basqarmasynyń basshysy Tileýǵalı Qyshqashbaev.
Kesh barysynda qazaq tiline sińirgen eren eńbegi úshin sport jáne óner ıelerine Astana qalasy ákimi Áset Isekeshevtiń «Til tuǵyry» qurmet marapaty tabystaldy. Aqyn Amanjol Áltaevqa marapatty elimizge belgili memleket qaıratkeri Myrzataı Joldasbekuly tapsyrsa, Rıo Olımpıadasynda top jarǵan boksshy Danııar Eleýsinovke til janashyry Orazgúl Asanǵazyqyzy tabys etti. Sonymen birge, saıasatker Álıhan Báımenov pen ǵalym Ǵarıfolla Esim ázil áleminiń júırigi Tursynbek Qabatov pen Álem barysy atanǵan Aıbek Nuǵymarovqa saltanatty túrde qurmet marapatyn tapsyrdy.
Aıta keterligi, bıyl qala ákimdigi «Til tuǵyry» qurmet marapatyn tuńǵysh ret tapsyryp otyr.
Kesh barysynda qazaq estradasynyń tanymal juldyzdary Altynaı Jorabaeva, Eskendir Ibragımov, Marjan Arapbaeva, Qýandyq Rahym jáne dástúrli ánshi Jasulan Tájıev ánnen shashý shashyp, kópshiliktiń qoshemetine bólendi.
Foto https://premiumevent.kz
