Tursynbek Qabatov jańa ázilkeshter jobasynyń prodıýseri bolady (FOTO)
ASTANA. QazAqparat - Elimizdiń eń úzdik ázilkeshi Tursynbek Qabatov «Qazaqstan» telearnasyndaǵy jańa «Kóńilashar» jobasynyń prodıýseri bolmaq, dep habarlaıdy «Qazaqstan» RTRK baspasóz qyzmeti.
Jobanyń árbir baǵdarlamasynda kúlkili monologtar, jaqsy ánder men myń buralǵan bıshilerdiń óneri kórermen nazaryna usynylmaq. «Kóńilashar» jobasynyń uıymdastyrýshylary qazirgi qoǵamnyń ózekti máselelerin kórermenderge ázil arqyly jetkizbek.
Elimizdiń eń úzdik ázilkeshi Tursynbek Qabatov bastaǵan baǵdarlamanyń bir top qatysýshylary jalpy adamzatqa tán qundylyqtardy nasıhattaıdy.
Jobanyń prodıýseri, ári júrgizýshisi Tursynbek Qabatov óz jobasy jaıynda: «Bul baǵdarlama kórermenderge ázil men mysqyl arqyly mańyzdy máseleler týraly oı salady. Elimizde tanymal ázilkeshter joqtyń qasy. Bizdiń kórermender úshin jańa baǵyttaǵy ázil qajet. Sapaly ázilderdiń az bolýyna baılanysty, kórermenderimiz sheteldik telearnalarǵa aýysýda.
Baǵdarlamamyzda Qazaqstannyń túkpir-túkpirinen halyq arasynan shyqqan úzdik ázilkeshterdi tańdaımyz. Olar bul ónerdi teatrdan meńgergen joq, kásibı ártis te emes. Qazaqstannyń barlyq óńirlerine baryp, kastıngqa qatysqan úsh júz adamnyń ishinen júz jıyrma adamdy iriktedik. Іrikteýden ótken adamdar «Qazaqstan» telearnasynyń efırinde jeńis úshin baq synasatyn bolady. Fınalǵa jobanyń úzdik bes qatysýshysy shyǵady jáne olar «Ázil álemi» teatrynyń rezıdentteri atanady. Bul bastamaǵa «Qazaqstan» RTRK» AQ Basqarma tóraıymy Nurjan Muhamedjanova usynys jasap, osylaısha biz «Kóńilashar» atty jobany jasadyq», - deıdi.
Baǵdarlamada birneshe aıdar bolady, olar: «Akterlik sheberlik», «Improvızatsııa» jáne t.b. «Akterlik sheberlik» aıdarynda qatysýshylar ózderiniń ártistik sheberligin kórsetse, «Improvızatsııa» aıdarynda olar ózderiniń jedel oılaýyn jáne kúrdeli jaǵdaılardaǵy tapqyrlyǵyn kórsetedi. Qatysýshylardyń ónerin Kóńildi tapqyrlar otaýynyń (KVN) juldyzy - Qumar Luqmanov, «Daryn» memlekettik syılyǵynyń laýreaty, Qazaqstan Respýblıkasynyń halyq ártisi - Saılaý Qamıev, sondaı-aq «Ázil álemi» teatrynyń dırektory jáne ártisi - Tursynbek Qabatovtan quralǵan ádil-qazylar alqasy baǵalaıtyn bolady.
Elimizdiń eń kúlkili adamdary kórermenderdiń kózaıymy jáne «Kóńilashar» baǵdarlamasynyń jeńimpazy ataný úshin kúresetin bolady. «Kóńilashar» baǵdarlamasyn «Qazaqstan» telearnasynyń efırinen 5 qazannan bastap dúısenbi-beısenbi aralyǵynda saǵat 23.35-te tamashalańyzdar.
