Tursyn Jurtbaıdyń Alash qozǵalysyna arnalǵan 3 tomdyq qujattar jınaǵy tanystyrylady

ASTANA. QazAqparat - QR Ulttyq akademııalyq kitaphanasynda Alashorda úkimeti men Alash avtonomııasynyń 100 jyldyǵyna oraı «El-Shejire» qoǵamdyq qory shyǵarǵan ǵalym-jazýshy Tursyn Jurtbaıdyń «Dvıjenıe Alash» atty 3 tomdyq qujattar jınaǵy men Bolat Múrsálimniń «Alashorda» fotoalbomynyń tanystyrylymy ótedi, dep habarlaıdy QazAqparat.

Sharanyń maqsaty Alash qaıratkerleriniń ómiri men qyzmetin ulyqtaý, ult-azattyq jolyndaǵy qozǵalystyń máni men mańyzyn kórsetý, Alash arystarynyń eńbegin nasıhattaý jáne máńgilikke qaldyrý.

Alash qozǵalysy otarlyq bılik júıesine qarsy baǵyttalǵan ult-azattyq qozǵalys ekeni belgili. Alash qaıratkerleriniń basty maqsaty - táýelsiz Qazaq memleketin qurý. Qozǵalys kóshbasshylarynyń aldynda qazaqtardy otarlyqtan bosatý jáne álemdik eń órkenıetti elderdiń qaýymdastyǵyna kirý degen maqsattar qoıylǵan. «Alash» qozǵalysynyń maqsat-múddeleri búgingi táýelsiz Qazaqstannyń saıası-áleýmettik jáne rýhanı-mádenı damý baǵdarlaryna tolyq sáıkes keledi.

B. Múrsálimniń «Alashorda» fotoalbomynda Alash arystarynyń ómiri men qyzmeti fotoderekter arqyly kórsetilse, T.Jurtbaıdyń «Dvıjenıe Alash» atty 3 tomdyq jınaǵy arhıvtegi qupııa qujattar men sot materıaldary negizinde qurastyrylǵan.

Tanystyrylym barysynda «Qazaqstan» RTRK» AQ basqarma tóraǵasy Erlan Qarın, Qazaqstannyń eńbek sińirgen qaıratkeri, fılologııa ǵylymdarynyń doktory Namazáli Omashev sóz sóıleıdi.

Sharaǵa áleýmettik mańyzy bar jobaǵa qarjylyq qoldaý kórsetken «Samuryq-Qazyna» ulttyq ál-aýqat qory» AQ ókilderi jáne «El-Shejire», «Degdar» qoǵamdyq kelisimdi qoldaý qoǵamdyq qorynyń qyzmetkerleri, otandyq jáne sheteldik ǵalymdar, zııaly qaýym, JOO oqytýshylary men stýdentter, sondaı-aq BAQ ókilderi qatysady.

Aıta keterligi, jınaqtardy «Samuryq-Qazyna» ulttyq ál-aýqat qorynyń qarjylyq qoldaýymen «El-Shejire» qaıyrymdylyq qory shyǵarǵan.