Týrsyz da, aqshasyz da qaldy: Aqtóbede 70-ten asa adam agenttikke aldanǵan
AQTÓBE. KAZINFORM — Barlyǵy 70-ten astam adam aryz jazdy. Polıtsııa aldanǵan adamdardy sany odan da kóp bolýy múmkin ekenin aıtty.
Іs Qylmystyq kodekstiń «Alaıaqtyq» baby boıynsha qozǵaldy. Qazir tergeý júrip jatyr.
— 37 jastaǵy týrıstik agenttik jetekshisi týrıstik saparlar uıymdastyrý jáne joldamalar satý syltaýymen azamattardan aqsha alǵan. Alaıda óziniń mindettemelerin oryndamaǵan. Sonyń saldarynan adamdar aqysyn tólegen týrıstik joldamalarynan da, qarjysynan da aıyrylǵan. Qazir polıtsııaǵa 70-ten astam jábirlenýshi aryzdandy. Keltirilgen materıaldyq shyǵynnyń jalpy kólemi 32 mıllıon teńgeden asady, — dep habarlady Aqtóbe oblystyq PD baspasóz qyzmeti.
Jábirlenýshiler sany odan da kóp bolýy múmkin. Sebebi aqtóbelikter ǵana emes, ózge óńir turǵyndary da aldanǵan.
— Týrıstik agenttiktiń zańsyz áreketterinen zardap shekken azamattardy Aqtóbe qalasy polıtsııa basqarmasynyń № 1 polıtsııa bólimine, ıaǵnı, Aqtóbe qalasy 11-yqsham aýdany 51 «A» mekenjaıyna kelýdi suraımyz. Sonymen birge turǵylyqty jerine jaqyn ornalasqan polıtsııa bólimine habarlasýǵa bolady, — dep habarlady baspasóz qyzmeti.
Qazirgi kezde kúdikti úıqamaqta otyr. Qazaqstandyqtar Threads jelisi arqyly bir-birine habar berip, polıtsııaǵa aryz jazýdy surap jatyr.
— Erkosh týrǵa FOUR TOUR aldanyp qalǵandar bar ma? Bizdi de qazan aıyndaǵy týrǵa aqshamyzdy jınap alyp, qazir telefondaryn óshirip, ofısterin jaýyp, múldem joq bolyp ketti. Aqtóbede bulardan taǵy kim aldandy? Qazir ne istep jatyrsyzdar, polıtsııaǵa nemese sotqa aryz berdińizder me? Bárimiz birigip, top quryp, birge áreket jasaıyq, — dep jazdy jeli qoldanýshysynyń biri.
Buǵan deıin Aqtóbede týrıstik qyzmet salasynda tutynýshylardyń quqyǵy jıi buzyla bastaǵanyn jazǵan bolatynbyz. Byltyrǵyǵa qaraǵanda bıyl shaǵym túsirgender sany 30% artqan.
