Týroperatorlar Taraz, Shymkent, Túrkistan, Aqtaýdyń týrıstik áleýetin baǵalady

NUR-SULTAN. QazAqparat - Nur-Sultan jáne Almaty qalalarynyń týroperatorlary Qazaqstannyń ońtústik óńiriniń týrıstik áleýetin baǵalap qaıtty, dep habarlaıdy QazAqparat Kazakh Tourism kompanııasynyń baspasóz qyzmetine silteme jasap.

Aqparattyq týr aıasynda Taraz, Shymkent, Saryaǵash pen Túrkistandy alty kúnniń ishinde aralap úlgergen sala mamandary atalǵan qalalardaǵy týrıstik ónimdi ázirleý men ony naryqta ilgeriletýge qatysty naqty tujyrymǵa keldi. Týroperatorlardyń pikirinshe, tarıhy tereńinen bastaý alatyn, ári Ejelgi Uly Jibek jolynyń boıyndaǵy qalalar úshin joldamalarǵa suranys joǵary bolady. Oǵan sheteldik týrıster ǵana emes, qazaqstandyqtar da qyzyǵýshylyq tanytady degen senimde.

Sondaı-aq, aqparattyq týrdyń qatysýshylary ár jerde kezdesetin, biraq túp tamyry birdeı máseleniń barlyǵyn ańǵardy. Onyń ishinde, shet tilderin meńgergen ekskýrsııa júrgizýshi mamandardyń tapshylyǵy, týrıstik mańyzy bar nysandarda qolaıly jaǵdaıdyń joqtyǵy, meımandardy kútý mádenıetiniń áli qalyptasa qoımaǵandyǵy, shıpajaılarda em-domdy uzaq qabyldaıtyndarǵa arnaıy mádenı baǵdarlamanyń uıymdastyrylmaıtyny syndy máseleler tezdetip sheshimin tabýy tıis.

«Mundaı aqparattyq týrlardy uıymdastyrý arqyly biz el ishilik týr baǵdarlamasyna qandaı nysandardy engizýge bolatynyn anyqtaı alamyz. Sondaı-aq, bolashaǵy bar týr ónimderdi qalyptastyrý úshin áli qandaı ister atqarylý qajettigi jaıly usynys bere alamyz», - deıdi aqparattyq týrǵa qatysýshylardyń biri Saltanat Abjanova.

Týrızm salasynda eńbegi sińgen qyzmetkerdiń pikirinshe, dámhanalarda as mázirin úsh tilde daıyndaý men mádenı baǵdarlamany qalyptastyrý syndy árbir usaq-túıektiń týrıstiń jadynda saqtalary anyq.

Esterińizge sala ketsek, ekinshi aqparattyq týrdyń aıasynda týrıstik kompanııalardyń ókilderi Taraz-Shymkent-Saryaǵash-Túrkistan-Aqtaý baǵyty boıynsha saparda júr. Aqparattyq týrdyń maqsaty –ár óńirdiń týrıstik áleýeti jaıly málimet jınap, ishki týrızmniń damýyna serpin berý. Aqparattyq týr qarashanyń 9-na deıin jalǵasty. Sapar Aqtaý qalasynda aıaqtaldy.

Aıta keterligi, respýblıkalyq aqparattyq týr bıyl ekinshi ret uıymdastyrylyp otyr. Buǵan deıin, mamyr aıynda ótkizilgen aqparattyq týrǵa elimizdiń batysyndaǵy 4 aımaqtan jınalǵan týroperatorlar Nur-Sultan – Býrabaı – Shymkent – Saryaǵash – Almaty – Almaty oblysy – Shyǵys Qazaqstan oblysy baǵyty boıynsha sapar shekken bolatyn.

Eske sala ketsek, aqparattyq týr músheleri eń aldymen Jambyl oblysynyń ortalyǵy – Taraz qalasyna barǵan edi.