Týrnırde Almaty oblysynyń ákimi oınaǵan voleıbol komandasy jeńiske jetti
TALDYQORǴAN. QazAqparat - Taldyqorǵanda ardagerler arasynda voleıboldan «Jetisý kýbogy» halyqaralyq týrnıri bastaldy, dep habarlaıdy QazAqparat Almaty oblysy ákiminiń baspasóz qyzmetine silteme jasap.
Jarysqa Qazaqstan, Reseı, Ózbekstan, Mońǵolııa, Týva, Býrıatııanyń komandalary qatysýda. Týrnırdiń saltanatty ashylýynda oblys ákimi Amandyq Batalov Jetisý jurtshylyǵy atynan ardagerler arasyndaǵy halyqaralyq týrnırige kelgen qonaqtardyń qadamyna sáttilik tilep, qazaqstandyq «Jetisý» komandasynyń sapynda oınady.
«Týrnırge kelgen komandalardyń ishinde ataqty oıynshylar - eńbek sińirgen sport sheberleri, voleıbol oıynynyń órisin keńeıtýge kóp eńbek sińirgen azamattar bar. Olar - birneshe býyn sportshylar úshin úlgi bolǵan kásibı mamandar. Sondyqtan búgingi týrnırdi ótkizý elimizde, sonyń ishinde oblysymyzda voleıboldy damytýǵa jasalǵan jaqsy bir qadam deýge bolady», - dedi A. Batalov.
Sonymen qatar óńir basshysy sporttyń bul túrimen qazirgi kezde oblystyń 83 myń turǵyn aınalysatynyn atap ótti. Tek bıylǵy jyldyń ózinde ǵana 47 voleıbol sektsııasy ashylǵan.
Týrnırdiń ashylý rásiminde sondaı-aq, Týva Respýblıkasy Voleıbol federatsııasynyń vıtse-prezıdenti, Parlament tóraǵasynyń kómekshisi Shyńǵys Kamınov, Mońǵolııanyń Voleıbol federatsııasynyń vıtse-prezıdenti Togtohbaıar Togsmandal (Toǵtobaıyr Toǵysmandyl) jáne basqa da qonaqtar sóz alyp, uıymdastyrýshylarǵa alǵys bildirýmen qatar oıynshylarǵa sátti qadam tiledi.
Týrnırdi birinshi bolyp Qazaqstannyń «Jetisý» komandasy men Býrıatııa Respýblıkasynyń voleıbolshylary bastady. Eki partııanyń nátıjesi boıynsha quramynda oblys ákimi Amandyq Batalov oınaǵan «Jetisý» komandasy 2:0 esebimen jeńiske jetti. Munan keıin oıyn alańyna Reseı men Mońǵolııa komandalary shyqty.
Aıta keterligi, Amandyq Batalov voleıboldan sport sheberi, sonymen qatar Qazaqstan Voleıbol federatsııasynyń vıtse-prezıdenti, Almaty qalasy men Almaty oblysy Voleıbol federatsııasynyń prezıdenti.
Jalpy voleıboldan halyqaralyq týrnır úsh kúnge jalǵasady, 19 qarasha kúni jeńimpaz komanda anyqtalady.
