Turmysy tómen jastardyń jobalaryna 1 mln teńgeden grant beriledi

ALMATY. QazAqparat - Áleýmettik jaǵynan az qamtylǵan almatylyq jastarǵa Búkilálemdik bank 1 mln teńgeden grant bóletin boldy, dep habarlaıdy QazAqparat tilshisi.

Bul týraly Almaty kásipodaqtar aımaqtyq birlestiginiń baspasóz qyzmeti habarlady. Qazaqstan Respýblıkasy men Halyqaralyq qaıta qurý jáne damý banki (Búkilálemdik bank) «Zhas Project» jobasyn júzege asyrý týraly kelisimge keldi. Bul joba áleýmettik jaǵynan az qamtylǵan jastardy áleýmettik jáne bıznes jobalarǵa tartýǵa baǵyttalǵan. Bul joba bıyl Qazaqstannyń 6 óńirin: Aqmola, Atyraý, BQO, Mańǵystaý, Almaty, Astana obylstaryn qamtıdy. Ár grant ıegerine 1 mln teńge beriledi. Qazir jergilikti aımaqtarda atalǵan baıqaý týraly túsindirý jumystary júrgizilip jatyr.

Jaqynda Astanada «Zhas Project» jobasynyń áriptesteri úshin baǵdarly semınar ótti. Semınardy Jastar korpýsyn damytý jobasyn iske asyratyn úılestirý agenttigi uıymdastyrdy. Jobany iske asyrýshy - Qazaqstan Respýblıkasynyń Bilim jáne ǵylym mınıstrligi.

Semınar aımaqaralyq yntymaqtastyqty damytý, ómirlik daǵdylar tujyrymdamasyn túsiný, áleýmettik turǵydan álsiz jastar tobymen jáne jastar bastamashyl toptarymen jumys isteý negizderin, jobanyń jumysyn túsindirýde buqaralyq aqparat quraldarymen jáne jurtshylyqpen jumys isteý daǵdylaryn nyǵaıtý úshin uıymdastyryldy. Úılestirý agenttiginiń mamandary jobany júzege asyrýdaǵy eki jyldyq jumys tájirıbesimen jáne elimizdiń alty óńirindegi odan ári jumys isteý josparlarymen bólisti.

2017 jyly osy baǵytta 589 áleýmettik joba iske asyrylǵan bolatyn.