Turmysy tómen otbasydan shyqqan oqýshylardyń 99 paıyzy mektepterde tegin ystyq tamaqpen qamtylyp otyr
ASTANA. 19 qarasha. QazAqparat - Qazaqstannyń bes óńiri basshylarynyń bastamasy arqasynda mektepterdegi bastaýysh synyptardyń oqýshylaryn ystyq tamaqpen qamtý 100 paıyz oryndalyp otyr. Bul týraly búgin Májiliste «Nur Otan» partııasy fraktsııasy janyndaǵy Áleýmettik keńesiniń otyrysynda Májilistegi Áleýmettik-mádenı damý komıtetiniń keńeıtilgen otyrysynda Bilim jáne ǵylym mınıstrliginiń Jaýapty hatshysy Álııa Ǵalymova osylaı málim etti. Eske salsaq, keńes otyrysynda «Mekteptegi balanyń tamaǵyn uıymdastyrý máselesi» talqylanǵan bolatyn.
Jaýapty hatshynyń aıtýynsha, júıeli túrde bastaýysh synyp oqýshylaryn ystyq tamaqpen qamtamasyz etip otyrǵan óńirler arasynda Astana jáne Almaty qalalary, Aqtóbe, Atyraý jáne Batys Qazaqstan oblystary bar. Budan bólek, búgingi tańda elimizdiń 10 óńirindegi mektep oqýshylarynyń arasynda az qamtylǵan otbasyǵa jatatyn oqýshylardy ystyq tamaqpen qamtý 100 paıyzǵa atqarylyp keledi.
«Jalpy alǵanda jalpy bilim beretin oqý mekemelerinde ystyq tamaqpen qamtamasyz etý (aqyly jáne aqysyz negizde) oqýshylardyń 79 paıyzyn nemese 1 mln. 929 myń 785 oqýshyny qamtyp otyr. Sonyń ishinde elimizdegi áleýmettik qorǵalmaǵan otbasydan shyqqan oqýshylardyń 99 paıyzy tegin ystyq tamaqpen qamtamasyz etilgen. Bilim berýdi damytýdyń memlekettik baǵdarlamasyna sáıkes, bul kórsetkish bıyl 92 paıyzǵa jetýi tıis bolatyn. Al baǵdarlama qabyldanǵanǵa deıin ol bar-joǵy 70 paıyz edi», - deıdi jaýapty hatshy Á. Ǵalymova.
