«Turmystyq zorlyqtyń aldyn alý týraly» QR zańy tolyqqandy jumys istep otyrǵan joq- «Qurbylar» daǵdarys ortalyǵynyń prezıdenti
ALMATY. Mamyrdyń 20-sy. QazAqparat /Erbol Azanbek/ - Ótken jyly qabyldanǵan «Turmystyq zorlyqtyń aldyn alý týraly» QR Zańy tolyqqandy júzege asyrylyp otyrǵan joq.
Bul týraly búgin Almatyda baspasóz klýbynda ótken máslıhatta «Qurbylar» daǵdarys ortalyǵynyń prezıdenti Nadejda Gladyr aıtty, dep habarlaıdy QazAqparat.
Onyń aıtýynsha, elimizde arnaıy zańnyń bolmaýyna baılanysty uzaq ýaqytqa deıin turmystyq zorlyqtyń aldyn alý máselesi qıyn bolyp keldi. «10 jyldyq daıyndyqtan soń byltyrǵy jyldyń 4-shi jeltoqsanynda arnaıy zań qabyldanǵan soń bul baǵytta ilgerleýshilik bolar dep úmittengenbiz. Alaıda qabyldanǵanyna 5 aı bolsa da zań júzege asyp otyrǵan joq», deıdi Nadejda Gladyr. Onyń aıtýynsha, zańdaǵy kórsetilgen mindetterdi tolyqqandy júzege asyrý úshin Úkimet tarapynan keshendi joba qabyldanýy kerek. Al Úkimettik emes uıymdar oǵan qoldaý kórsetýge daıyn. «Zańnyń tolyqqandy jumys isteýi úshin «Turmystyq zorlyqtan zardap shekkenderdiń ortalyǵy» memlekettik mekemesin ashý, olarǵa quqyqtyq, psıhologııalyq keńes berýdi jolǵa qoıý, arnaıy trenıgter men semınarlar ótkizý, aqparattyq nasıhat júrgizý qajet. Qazirgi tańda bul qyzmetterdi elimizde tek bizdiń ortalyq qana júzege asyryp otyr. Alaıda jalǵyz uıymnyń shamasy jetpeıdi», deıdi «Qurbylar» ortalyǵynyń prezıdenti.
