Turmystyq zorlyq-zombylyqtyń qurbandary eń birinshi memleket tarapynan kómek alýy kerek - B. Áıtimova
ASTANA. 23 qańtar. QazAqparat - Turmystyq zorlyq-zombylyqtyń qurbandary eń birinshi memleket tarapynan kómek alýy kerek. Búgin Parlament Senatynyń jalpy otyrysynda turmystyq zorlyq-zombylyqqa qarsy is-qımyl máseleleri týraly zań jobasyn talqylaý barysynda senator Birǵanym Áıtimova osyndaı pikir bildirdi.
Depýtattyń aıtýynsha, talqyǵa túsken zań jobasy turmystyq zorlyq-zombylyqtaǵy barlyq problemalardy sheshe almaıdy. Degenmen, munda qordalanǵan problemalardy sheshýge kezekti qadam jasalyp otyr. «Jalpy elimizde osy baǵytta nysanaly jumys jasalyp jatsa da, birqatar kemshilikter barshylyq. Meniń oıymsha, áleýmettik qorǵansyz qalǵan turmystyq zorlyq-zombylyqtyń qurbandary eń birinshi memleket tarapynan kómek alýy qajet. Sebebi, osyndaı qıyn jaǵdaıǵa tap bolǵan áıelder qoǵamdyq ómirge belsendi aralasa almaıdy», - deıdi senator B. Áıtimova.
Sonymen qatar, senator japa shekkenderge jergilikti kómek kórsetý uıymdary tarapynan qoldaý jasaýǵa bolatynyn, alaıda ondaı uıymdar keıbir óńirlerde múldem joq ekenin alǵa tartady.
Budan bólek, depýtat B. Áıtimova turmystyq zorlyq-zombylyqqa tap bolǵandar úshin senim telefondary qyzmetin jetildirý qajettigin de atap ótti. Onyń aıtýynsha, bundaı senim telefondarynyń úzdiksiz qyzmetin jergilikti organdar sheshý qajet.
«Tótenshe jaǵdaılarda shuǵyl habarlasatyn órt, polıtsııa, jedel járdem sekildi qyzmetterdiń qatarynda turmystyq zorlyq-zombylyqtan zardap shekkenderge arnalǵan senim telefondary da bolýy shart. Sebebi qazaq áıelderi jasqanshaqtaý keledi, sosyn ózine qol kótergenine qaramastan joldastaryna keshirimmen, aıaýshylyqpen qaraý olardyń minezine ábden sińgen. Eń aqyry quqyq qorǵaý organdary, jergilikti bılik organdary, jalpy tutastaı alǵanda árbir azamattyń jumysy zorlyq-zombylyqtyń qandaı túri bolmasyn tózimsizdik qaǵıdatyna negizdelýi tıis», - deıdi B. Áıtimova.
