Turmystyq zorlyq-zombylyq: Karantın kezinde Daǵdarys ortalyǵynda oryn qalmaǵan
«Bizdiń ortalyqqa turmystyq zorlyq-zombylyq kórgen júzdegen áıel júginedi. Biz olardy turǵylyqty mekenjaıyna qaramastan qabyldaımyz. Tipti, taǵdyry tálkekke túsken sheteldik qyz-kelinshekterge de qoldaý kórsettik. Mysaly, Almatyda ýaqytsha turyp jatqan Reseı, Moldova, Ózbekstan, Tájikstan, Qyrǵyzstan áıelderine de qol ushyn sozdyq», – deıdi Tatıana Mıdo.
Onyń aıtýynsha, buryn kúıeýinen zorlyq-zombylyq kórgen áıelder kóbine jurttan uıalyp, ol jaıtty jasyryp qalatyn. Qazir jaǵdaı ózgerdi. Názik jandylar ózderin qorǵaıtyn zańnyń, túrli ortalyqtardyń bar ekenin túsindi.
«Ortalyqqa júginetinderdiń sany jyl sanap artyp keledi. Eger 2019 jyly ortalyq 310 áıel men balaǵa kómek kórsetse, 2020 jyldyń 1 tamyzyndaǵy jaǵdaı boıynsha bizge 217 áıel tústi. Biz karantın kezinde de shtattyq rejımde jumys istedik. Ol ýaqytta bizge 56 adam júgindi. Bul óte kóp. Daǵdarys ortalyǵynda oryn qalmady. Desekte, kúıeýinen taıaq jegen 5-6 balasy bar áıelderge barynsha jaǵdaı jasadyq»,– deıdi dırektordyń orynbasary.
Sonymen qatar, T.Mıdo karantın kezinde ortalyqqa túsken eki balaly ananyń taǵdyry týraly aıtyp berdi.
«Elde tótenshe jaǵdaı jarııalanǵan kezde, bizdiń ortalyqqa eki balasy bar áıel tústi. Ol balalaryn Almaty qalasyndaǵy perzenthanada bosanǵan. Alaıda, olarǵa týý týraly kýálik berilmegen. Sebebi, anasynyń jeke kýáligi bolmaǵan. Keıin anyqtalǵandaı, osydan 15 jyl buryn kámelettik jasqa tolmaı turǵan kezinde Almatyǵa anasymen Ózbekstannan qonaqqa kelgen eken. Anasy ony jazǵy demalysta týysqandaryna qaldyryp ózi eline qaıtyp ketken. Kóp uzamaı anasy qaıtys bolyp ketedi. Sóıtip ol bizdiń elde qalyp qoıǵan. 2005 jyldan beri bul áıel Qazaqstan aýmaǵynda eshqandaı qujatsyz ómir súrip kelgen. Ol Qazaqstannyń da, Ózbekstannyń da azamaty emes. Bizdiń ortalyqqa túskennen keıin balalarynyń jáne óziniń qujatyn daıyndaýǵa kómektestik. Ózderińiz bilesizder, bul ońaı sharýa emes. Aldaǵy ýaqytta da biz oǵan kómektesetin bolamyz»,–deıdi ol.
Ortalyq málimetterine sáıkes, munda 8 túrli áleýmettik qyzmet kórsetiledi. Áıelderge zańgerler men psıholog mamandarynyń keńesi uıymdastyrylyp, áleýmettik qoldaý kórsetiledi.
