Turmystyq zorlyq-zombylyq: 17 myńnan astam adam jaýapkershilikke tartyldy
Jıynda komıssııa tóraǵasy Lazzat Ramazanova Memleket basshysy Qasym-Jomart Toqaevtyń Qazaqstan halqyna Joldaýynda qoıylǵan mindetterge toqtaldy.
«Memleket basshysy eldegi otbasylyq-demografııalyq ahýal áli de mańyzdy alańdaýshylyq týǵyzyp otyrǵan másele ekenin atap ótti. Ulttyq komıssııa otbasylyq jáne genderlik saıasat máselelerin júıeli túrde sheshýdiń naqty mindetterin qoıdy. Olardyń tıimdi júzege asyrylýy úshin barlyq múddeli memlekettik organdardyń jaýapkershiligi, kásibıligi jáne qyzyǵýshylyǵy qajet», - dedi Lazzat Ramazanova.
Sońǵy úsh jylda otbasylyq-turmystyq qatynastar salasyndaǵy quqyq buzýshylyqtardyń sany 2,5 esege artty (2017 j. - 445, 2018 j. - 919, 2019 j. - 1052). Jaǵdaıdy bıylǵy pandemııa men karantındik sharalar odan ári qıyndatty. Jyl basynan beri turmystyq quqyq buzýshylyq úshin 17 myńnan astam adam ákimshilik jaýapkershilikke tartyldy. 55 myńnan astam qorǵaý buıryqtary shyǵaryldy. 7 myńnan astam quqyq buzýshynyń tártibine qatysty arnaıy talaptar belgilendi.
Qazir Parlament Májilisi otbasylyq jáne turmystyq zorlyq-zombylyqqa qarsy is-qımyl týraly eki zań jobasyn qarastyrýda. Olar turmystyq zorlyq-zombylyqtyń aldyn-alý sýbektileriniń ókilettikterin, mindetteri men jaýapkershilikterin naqtylaýǵa, sondaı-aq vedomstvoaralyq yntymaqtastyqty nyǵaıtýǵa múmkindik beretini otyrysta atap ótildi.
Aqparat jáne qoǵamdyq damý mınsıtrliginiń ókilderi Ulttyq komıssııaǵa neke jáne otbasy ınstıtýtyn nyǵaıtýǵa baǵyttalǵan áleýmettik jobalardyń nátıjeleri týraly habarlady. 2019 jyly elimizdiń segiz oblysynda otbasylyq sottardyń janyndaǵy 12 «Baqytty otbasy» atty otbasylyq resýrstardy qoldaý ortalyqtary iske qosyldy. Ol jerden 2,5 myńnan astam adam psıhologtyń, zańgerdiń, medıatordyń, medıtsınalyq jáne áleýmettik qyzmetkerdiń, daǵdarys jaǵdaıyndaǵy mamannyń aqysyz keńesterin aldy. 2030 adam ajyrasý máseleleri boıynsha keńes aldy.
ÓNEGE jobasy aıasynda Qazaqstannyń toǵyz aımaǵyndaǵy áleýmettik qyzmetter 1125 konsýltatsııalyq qyzmet kórsetti jáne 225 qıyn ómirlik jaǵdaıdaǵy otbasylarǵa qoldaý kórsetti. Alty myńnan astam maman men jastarǵa turmystyq zorlyq-zombylyqpen kúresý, otbasylyq ómirge daıyndyq, reprodýktıvti densaýlyq máseleleri, balalar men jasóspirimder arasyndaǵy sýıtsıd pen buzaqylyqtyń aldyn alý boıynsha kýrstar ótkizildi. «Adam quqyqtaryn qorǵaýshy» jobasy aıasynda barlyq óńirlerde Jastar resýrstyq ortalyqtarynyń negizinde «Qorǵaý» zańgerlik keńes berý ortalyqtarynyń jumysy uıymdastyrylyp, ol jerden 19 myń adam aqysyz keńes alǵan.
Otyrys sońynda Lazzat Ramazanova memlekettik organdarǵa birqatar naqty usynystar berdi.