Turmystyq qatty qaldyqtardy joıý boıynsha ulttyq strategııany júzege asyrýǵa 150 mlrd. teńge qajet

Bul týraly búgin QR Qorshaǵan ortany qorǵaý mınıstrliginde ótken semınarda atalǵan joba sarapshylar tobynyń jetekshisi Rassel Frost aıtty.

Qazirgi ýaqytta bul baǵdarlamanyń qarjylandyrý kózi naqtylanbaǵandyǵyn atap ótken ol: «Bul baǵdarlamanyń barlyq is-sharalaryn júzege asyrýdyń jalpy quny eldiń barlyq óńirlerinde shamamen 150 mlrd. teńgeni quraıdy», - dedi.

Onyń atap ótýinshe, qarjylandyrý kózin anyqtaý el Úkimetiniń qaramaǵyna berilgen. Bul oraıda top jetekshisi osy strategııa aıasynda birqatar is-sharany bastaý úshin Mınıstrler Kabınetiniń granttyq qarjylandyrý tetikterin iske qosýy múmkin ekendigin de joqqa shyǵarmaıdy. Sonymen qatar qarjylandyrý kózderi jeke kompanııalar da bolady. Óıtkeni olardyń kommertsııalyq bankterden qarjy tartý múmkindikteri bar. Osyndaı jobalardy júzege asyrýǵa múddelilik tanytqan halyqaralyq uıymdardy da tartýǵa bolady.

Degenmen jeke sektor bundaı jobaǵa qarjy salǵannan góri, tabys alǵysy keletindigin de atap ótken R.Forsttyń pikirinshe, tarıfter jeke operatordyń salǵan qarjysyn qaıtarýmen qatar iske qosý shyǵyndaryn jaýyp, kiris alýǵa múmkindik berýi qajet.

Ulttyq strategııa aıasynda shamamen 150 óńirlik polıgon qurý boljanýda. Olardyń basym bóligi shaǵyn eldi mekenderge qyzmet kórsetý úshin shaǵyn kólemde salynady. Qazirgi ýaqytta joba aıasynda oblystyq jáne aýdandyq deńgeıde is-sharalardy josparlaý boıynsha jetekshilik ázirlenýde. Іlki óńir retinde Qyzylorda men Kókshetaý qalalary tańdalǵan.