Turmystyq qaldyqtardy qaıta óńdeý deńgeıi 2019 jyly 15 paıyzdy qurady
NUR-SULTAN. QazAqparat – Qazaqstannyń «jasyl ekonomıkaǵa» kóshýi boıynsha tujyrymdamasynyń bir baǵyty – turmystyq qaldyqtardy óńdeýdi jetildirý, sondaı-aq óndirýshiniń keńeıtilgen jaýapkershiligi (ÓKJ) qaǵıdatyn engizý bolyp otyr. «AWOK» óńdeýshiler, ýtılızatorlar, qoqys shyǵarýshy uıymdary qaýymdastyǵynyń atqarýshy dırektory Azamat Aıaıbergenov osy rette QazAqparat tilshisine ÓKJ qaǵıdatyn engizýdiń mańyzdylyǵy týraly túsindirip berdi.
«Qaptama úshin aqy osy jyldyń qańtar aıynda engizildi. 2017 jyldan bastap-aq ÓKJ operatory qaptamalar (atap aıtqanda plastmass, joǵary jáne tómengshi qysymdaǵy polıetılen, polıetılentereftalat, polıpropılen, qaǵaz jáne kartondy, shyny) qaldyqtaryn jınaý, tasymaldaý jáne ýtılızatsııalaý boıynsha sýbsıdııaǵa qarajat bólip keledi. Tıisinshe óndirýshilerdiń keńeıtilgen mindettemeleriniń arqasynda ımportshylar aqysyn tólese qaıta óńdeý deńgeıi de óse bermek. 2019 jyldyń statıstıkalyq qorytyndysyna súıensek turmystyq qatty qaldyqtardy qaıta óńdeý deńgeıi 15 paıyzdy kórsetken. Atalǵan kórsetkish óndirýshilerdiń keńeıtilgen jaýapkershiliginiń artýymen baılanysty ekenin aıqyn baıqaımyz», - deıdi Azamat Aıaıbergenov.
Onyń aıtýyna qaraǵanda qaǵaz, shyny óndirý, polımerli ónerkásip salasyndaǵy otandyq kásiporyndar óz óndirisinde qaldyqtardyń 30 paıyzyn paıdalana alady. Olar osylaısha ýtılızatsııalyq tólemnen bosatylyp, ÓKJ operatorynan shaǵyn sýbsıdııa alady. ıAǵnı olar naryqtyń ózge oıynshylarynan qaraǵanda básekege qabiletti bola túsedi.
«Máselen jergilikti syra nemese sharap shyǵaratyn kompanııaǵa Qazaqstan aýmaǵynda shyǵarylǵan shyny bótelke satyp alý tıimdi bolmaq. Osynyń bári birige kele qaıta óńdeý salasyn órkendetedi. Qazirgi tańda 70 myń tonnaǵa tarta makýlatýra artyq qalyp, onyń áleýeti kómilip qoımada jatyr. Bul degenińiz ınfraqurylymnyń damyp, ekinshi deńgeıli materıaldardyń paıdasy artyp kele jatqanyn kórsetedi», - dedi «AWOK» qaýymdastyǵynyń basqarýshy dırektory.
Azamat Aıaıbergenov qazirdiń ózinde qaldyqtardy bólek jınaý tártibi jolǵa qoıylyp kele jatqanyn jetkizdi.
«Elordadaǵy árbir aýlada qoqysty bólek jınaıtyn sary konteınerler bar. Sonymen qatar ÓKJ operatory halyq ishinde de nasıhat jumystaryn kúsheıtip jatyr. Ary qaraı ýtılızatsııalyq tólemnen túsken qarajatty ÓKJ operatory basqa qalalardaǵy ınfraqurylymnyń damýyna jumsaıdy», - dep túıdi Azamat Aıaıbergenov.
