Turmystyq zorlyq-zombylyqqa qatysty jazany qataıtýdy tolyq qoldaımyn - Prezıdent

Memleket basshysy Qasym-Jomart Toqaev Egemen Qazaqstan gazetine bergen suhbatynda turmystyq zorlyq-zombylyqqa qatysty jazany qataıtýdy tolyq qoldatyndyǵyn aıtty, dep habarlaıdy Kazinform.

«Men elimizde «zań men tártip» qaǵıdatynyń ornyǵa túskenin qalaımyn. Sondyqtan naqty jaýap bereıin, turmystyq zorlyq-zombylyqqa qatysty jazany qataıtýdy tolyq qoldaımyn. Siz aıtqan petıtsııa zań talabyna saı kelse de, kelmese de, azamattardyń pikiri mindetti túrde eskeriledi. Oǵan kúmán bolmasyn», - dedi Memleket basshysy.

Prezıdent paıymynsha, qoǵamda ozbyrlyq pen zorlyq-zombylyqtyń kez kelgen túrine múldem tózbeıtin túsinik qalyptaspasa, zańǵa engizilgen ózgeristerden asa qaıyr bolmaıdy.

«Jurt zorlyq-zombylyq jasaǵandarǵa jazany qataıtýdy talap ete tura, qylmys álemindegi shytyrman oqıǵalarǵa tańdaı qaǵyp, fılmderdiń zańdy belden basatyn keıipkerlerin ǵana emes, tipti shynaıy ómirdegi kánigi qylmyskerlerdiń ózin pir tutyp jatady. Bul jaǵdaı bir-birine múlde kereǵar jáne óte oǵash kórinedi. Solaı emes pe?! Biz qoǵamdy ishinen iritetin, adamgershilikke jat qylyqtardy aqtaýdy kózdeıtin kez kelgen áreketke jáne quqyqtyq nıgılızmge tutas el bolyp tosqaýyl qoıýymyz kerek. Biz zańsyzdyq pen qatygezdikke bir kisideı, batyl qarsy turýymyz qajet. Sondaı-aq qoǵam normalar men erejelerdiń jáne jalpy adamzatqa ortaq qundylyqtardyń aıaqasty bolýyn qatań aıyptap, onymen birlese kúresýi kerek», - dedi Qasym-Jomart Toqaev.