Turmystyq zorlyq-zombylyq jasaǵany úshin qamaýǵa alynǵandar sany 2 esege artty
ASTANA. KAZINFORM – Ótken jyly polıtsııa turmystyq janjal týraly 100 myńǵa jýyq habarlama tirkedi. Bul týraly ІІM Ákimshilik polıtsııa komıteti tóraǵasynyń mindetin atqarýshy Renat Zýlhaırov aıtty.
«Ótken jyly Prezıdenttiń tapsyrmasymen turmystyq zorlyq-zombylyq úshin jaýapkershilik kúsheıtildi. Qylmystyq jáne Ákimshilik kodeksterge túzetýler engizildi. 2023 jyldyń 1 shildesinen bastap polıtsııa ótinish berýden turmystyq quqyq buzýshylyqtardy tirkeýdiń anyqtaýshy sıpatyna kóshti. Ákimshilik is qozǵalady. Sońǵy quqyqtyq baǵalaýdy sot beredi. Jańa zańnama aıasynda turmystyq janjaldar týraly 50 myń ótinish qaraldy. Materıaldardyń 64 paıyz boıynsha ákimshilik is júrgizildi. Ákimshilik qamaýǵa alynǵan adamdardyń sany 2 esege artty. Sotta 27 myńnan astam otbasy tatýlasty», - dedi ol Ortalyq kommýnıkatsııalar qyzmetindegi dóńgelek ústel barysynda.
Renat Zýlhaırovtyń atap ótýinshe, ІІM zorlyq-zombylyqqa ushyraǵan otbasylarmen aldyn alý jumysyn jandandyrdy. Ótken jyly polıtsııada turmystyq janjal týraly 100 myńǵa jýyq habarlama tirkelgen. Onyń ishinde 15 myń turmystyq zorlyq-zombylyq faktisin polıtsııa qyzmetkerleri anyqtady. Barlyq tirkelgen faktiler boıynsha kináliler zańda kózdelgen jaýapkershilikke tartyldy.
«Árbir otbasylyq janjalqoı zańmen zorlyq-zombylyq jasaǵany úshin 5 táýlikten bastap, ómir boıyna bas bostandyǵynan aıyrýǵa deıin ákimshilik qamaýǵa alý jaýapkershiligi qarastyrylǵanyn bilýi kerek. Ótken jyly 79 myńnan astam quqyq buzýshy ákimshilik, myńǵa jýyq azamat qylmystyq jaýapkershilikke tartyldy», - dedi ІІM ókili.
