Turmystyq zorlyq-zombylyq jasaǵandar qylmystyq jaýapkershilikke tartylady – Erlan Qoshanov

Májilis spıkeri Erlan Qoshanov elimizde áıelderge zorlyq-zombylyq jasaýdyń aldyn alý baǵytynda qandaı is-sharalar qabyldanyp jatqany týraly aıtty, dep habarlaıdy Kazinform.

«Búgin biz Ortalyq Azııa elderi áıelderiniń dıalogyna qazaqstandyq tóraǵalyq etýdi qorytyndylap otyrmyz. Bir jyl ishinde jemisti jumys isteldi. Joǵary trıbýnalardan ınnovatsııalar men tehnologııalardy damytýdyń, jahandyq aspektidegi beıbitshilik pen qaýipsizdiktiń, klımattyń ózgerýiniń, terrorızm men ekstremızmge qarsy kúrestegi áıelder men jastardyń róliniń ózekti máseleleri kóterildi. Bul óte mańyzdy taqyryptar. Búgingi kún tártibinde eshkimdi beı–jaı qaldyra almaıtyn mańyzdy másele - genderlik zorlyq-zombylyqqa qarsy turý», - dedi Erlan Qoshanov elordada ótip jatqan «Ortalyq Azııa elderi áıelderiniń dıalogy» konferentsııasynda.

Onyń aıtýynsha, genderlik zorlyq-zombylyq aýqymdy sıpatqa ıe.

«Bul búkil álemdegi jahandyq problemalardyń biri. Birikken Ulttar Uıymynyń málimeti boıynsha, álemdegi árbir úshinshi áıel fızıkalyq nemese jynystyq zorlyq-zombylyqqa tap bolǵan. Osy qoǵam dertimen kúresý úshin álemniń 155 elinde turmystyq zorlyq-zombylyq týraly zańdar qabyldady», - deıdi ol.

Qazaqstanda sońǵy jyldary otbasylyq-turmystyq zorlyq-zombylyqqa qarsy kúres aıasynda jazalar únemi qatańdatylýda.

«Búgin biz, zań shyǵarýshylar, odan ári qaraı júrdik. Depýtattar osy saladaǵy zańnamalyq novellalardyń jańa paketin ázirleýge kiristi. Birinshiden, biz turmystyq zorlyq-zombylyq úshin jaýapkershilikti qylmystyq jaýapkershilikke tartýdy josparlap otyrmyz», - dep tolyqtyrdy Májilis spıkeri.

Aıta keteıik, elordada «Ortalyq Azııa elderi áıelderiniń dıalogy» konferentsııasy ótip jatyr.

Atalǵan sharaǵa Ózbekstan, Qyrǵyzstan, Túrikmenstan, Tájikstan elderiniń ókilderi qatysýda.