Turmystyq zorlyq-zombylyq kórgender qaıda júgine alady

ASTANA. KAZINFORM –  Mamandardyń málimdeýinshe, turmystyq zorlyq-zombylyq qoǵamdaǵy eń ózekti máselelerdiń biri bolyp otyr. Olardyń aıtýynsha, der kezinde áreket etip, qol ushyn sozý mańyzdy.

- Úıdegi zorlyq-zombylyq fızıkalyq, psıhologııalyq, ekonomıkalyq nemese seksýaldyq sıpatta bolýy múmkin. Kóbine onyń qurbandary – áıelder men balalar. Qaýip belgilerin der kezinde anyqtap, polıtsııaǵa, jedel járdemge nemese daǵdarys ortalyǵynyń senim telefondaryna jedel júginý qajet. Astanada zardap shekkenderge kómek kórsetetin «Úmit» ortalyǵy jumys isteıdi. Bizdiń ortalyq qaýipsizdikti qamtyp, sondaı-aq psıhologııalyq, quqyqtyq jáne áleýmettik qoldaý kórsetedi. Jyl ishinde munda 200 adam kómek aldy, 500-den astam konsýltatsııa jáne ondaǵan trenıng ótkizildi. Áıelder men balalardyń 85%-y qalypty ómirge oralyp, tolyq qalpyna keldi, - dedi Astana qalasy ákimdiginiń «Úmit» daǵdarys ortalyǵynyń dırektory Ǵalıhan Kýkanbekov Astana qalasy kommýnıkatsııalar qyzmeti alańynda ótken baspasóz máslıhatynda.

Odan bólek, atalǵan ortalyqtyń zańgerleri alıment, ajyrasý, qujattar jáne múlik daýy boıynsha kómek kórsetedi. Sonymen qatar jumysqa ornalastyrý, baspanamen qamtý jáne kásipkerlik kýrsyn oqý múmkindigi de qarastyrylǵan.

- Eger zorlyq-zombylyqtyń kýási bolsańyz nemese kómek qajet etseńiz, 71 60 63, 111 nemese «102» nómirlerine habarlasa alasyz, - deıdi ol.

Elimizde jyl saıyn polıtsııaǵa turmystyq zorlyq-zombylyq týraly 100 myńnan astam habarlama túsedi.